! . വഴിപോക്കന്റെ ഡയറിക്കുറിപ്പുകള്‍ . !

കുറ്റം, ശിക്ഷ, വീണ്ടുവിചാരം

2011-10-31T22:56:00.041Z

ശുദ്ധ വായു തീര്‍ക്കുന്നവന്‍
അന്നം തിന്നു മുടിക്കുന്നവന്‍
വെള്ളം കുടിച്ചു വറ്റിക്കുന്നവന്‍
ഇന്ധനം തീര്‍ക്കുന്നവന്‍
കുറ്റപത്രം നീളുന്നു...
എനിക്കും നിനക്കും
മുഖ്യ ശത്രു അവന്‍ മാത്രം

*******
അവനും ലോകത്തിനുമിടെ
റബറിന്റെ വന്മതില്‍ തീര്‍ക്കാം
പില്‍സ് കൊണ്ട് വെടിയുതിര്‍ക്കാം
ജനിക്കും മുമ്പേ കുത്തിക്കൊല്ലാം
സെപ്റ്റിക് ടാങ്കില്‍ കുഴിമാടമൊരുക്കാം
എനിക്കും നിനക്കും ജീവിക്കണം
അവന്‍ ജനിക്കരുത്, ലോകം കാണരുത്

*******
ഓര്‍ക്കുക, ഒരു ദിനം

വിസ്തരിക്കപ്പെടും അന്ന്‍
കുഴിച്ചു മൂടപ്പെട്ട കുട്ടിയെ
അവ(ള്‍)ന്‍ ചെയ്ത കുറ്റത്തെ
അറിയുക, ഒരു കാര്യം
എന്നെയും നിന്നെയും അവരെയും
തീറ്റുന്നതൊരേ ഒരാള്‍, ദാരിദ്ര്യം അവനന്യം

=====================

[പശ്ചാത്തലം: ലോക ജനസംഖ്യ എക്കാലത്തെയും ഉയര്‍ന്ന സംഖ്യയില്‍ എത്തി നില്‍ക്കുമ്പോള്‍ നമ്മുടെ നിലനില്‍പ്പിനു ഭംഗം വരുമെന്ന ഭയത്തില്‍ ജനിക്കാനുള്ള അവകാശം നിഷേധിക്കപ്പെടുന്ന മനുഷ്യ ബീജങ്ങളെ ഓര്‍ത്ത് എഴുതിയത്.
പട്ടിണിയെ/സ്ഥലപരിമിതിയെ പെരുപ്പിച്ചു കാട്ടി നാളെ ജനിക്കേണ്ട കുട്ടിയുടെ ജനിക്കാനുള്ള, ജനിച്ചു പോയാല്‍ നമ്മളെ പോലെ ജീവിക്കാനുള്ള അവകാശം നിഷേധിക്കുന്ന ജസ്റ്റിസ്‌ കൃഷ്ണയ്യര്‍ കമ്മീഷന്‍ പോലുള്ള കമ്മീഷന്‍ റിപ്പോര്‍ട്ടുകളുടെ ശവപ്പെട്ടിക്കു സമൂഹം തറച്ച അവസാനത്തെ ആണിക്ക് ഈ വരികള്‍ സമര്‍പ്പിക്കുന്നു.]

അന്ധകാരത്തിലേക്ക് റോകറ്റ് വിടുന്ന ഐ എസ് ആര്‍ ഒ

2011-05-04T06:19:00.005+01:00

Click to expand the news

ഏപ്രില്‍ ഇരുപതിന് വിജയകരമായി വിക്ഷേപിച്ചു എന്ന് നാം അഭിമാനപൂര്‍വ്വം പറയുന്ന ഇന്ത്യന്‍ സ്പേസ് റിസര്‍ച് ഓര്‍ഗനൈസേഷന്റെ പി.എസ്.എല്.വി-സി16 ദൌത്യത്തിന്റെ പിന്നാമ്പുറ കഥകള്‍ അത്യന്തം അപകടകരമായ അവസ്ഥയിലേക്കാണ് ഇന്ത്യ നീങ്ങുന്നത് എന്ന് വ്യക്തമാക്കുന്നു. പ്രപഞ്ചത്തെയും, നമ്മുടെ അന്തരീക്ഷത്തെയും കുറിച്ച് കൂടുതല്‍ വിവരങ്ങള്‍ അറിയാന്‍ സഹായിക്കുന്ന റഷ്യയുടെ സഹായത്തോടെ നിര്‍മിച്ച യൂസാറ്റും, സിംഗപൂരിന്റെ എക്സ്-സാറ്റും നമ്മുടെ സ്വന്തം റിസോഴ്സ്സാറ്റ്-2 വും വഹിച്ചായിരുന്നു പോളാര്‍ സറ്റലൈറ്റ് ലോഞ്ച് വെഹിക്കിള്‍ (PSLV)-C16-ന്റെ യാത്ര. ഉപഗ്രഹങ്ങളെല്ലാം ഗ്രഹപ്പിഴയോ ഗ്രഹണിയോ കൂടാതെ എത്തേണ്ടിടത് എത്തി എന്നത് ഏതൊരിന്ത്യക്കാരനും അത്യധികം സന്തോഷം നല്‍കുന്ന കാര്യം തന്നെ.

റിസോഴ്സ്സാറ്റ്-2 വിന്റെ പ്രധാന ദൌത്യം വനനശീകരണം മോണിടര്‍ ചെയ്യുക, കാലാവസ്ഥാ പ്രവചനം, ജലസ്രോതസ്സു കണ്ടെത്തുക, ജല സംഭരണികളിലെയും തടാകങ്ങളിലെയും ജലനിരപ്പ്‌ കണ്ടെത്തുക, കാട്ടുതീ കണ്ടെത്തുക, തുടങ്ങിയവയാണ്. പക്ഷെ മൂന്നു ഉപഗ്രഹങ്ങളെ കൂടാതെ അത്യന്തം വിനാശകരമായ ചീഞ്ഞളിഞ്ഞ അന്ധവിശ്വാസവും കൂടി ചുമന്നായിരുന്നു PSLV-C16-ന്റെ യാത്ര എന്നത് ആത്മാഭിമാനമുള്ള ഏതൊരിന്ത്യാക്കാരനും അപമാനകരം തന്നെയാണ്.

ISRO-യിലെ ഉന്നത ഉധ്യോഗസ്ഥന്‍ ഉപഗ്രഹ വാഹിനിയുടെയും മൂന്നു ഉപഗ്രഹങ്ങളുടെയും മാതൃകകള്‍ തിരുപ്പതി ക്ഷേത്രത്തില്‍ കൊണ്ട് പോയി (ഔദ്യോഗികമായി) പൂജിച്ചു അതിനെ കുറ്റവിമുക്തമാക്കി എന്ന വാര്‍ത്ത കൂടുതല്‍ ചര്‍ച്ച ചെയ്യാതെ പോയതും, യുക്തിവാദികള്‍ പോലും ഈ വിഷയത്തില്‍ ഒരക്ഷരം മിണ്ടിയില്ല എന്നതും ആശങ്കാജനകം തന്നെ.

ഉപഗ്രഹ മാതൃകയും കിടുതാപ്പുകളും പൂജിച്ചു കുറ്റവിമുക്തവും ഐശ്വര്യപൂര്‍ണവുമാക്കുന്നതിനു തിരുപ്പതിക്കു പോയ ISRO-യിലെ ഉണ്ണാക്കന്മാരോടായി (ഊണ് കഴിക്കുന്നവര്‍ എന്ന അര്‍ത്ഥത്തില്) ഒരു ചോദ്യം, ഇങ്ങനെ ഒരു ഉപഗ്രഹ ദൌത്യത്തിനായി തിളങ്ങുന്ന ഇന്ത്യയുടെ 250 കോടി രൂപ ചിലവാക്കേണ്ട വല്ല ആവശ്യവുമുണ്ടോ? ISRO-യില്‍ കവടി നിരത്താന്‍ രണ്ടു കണിയാന്മാരെയും കുറച്ചു മഷിനോട്ടക്കരെയും ഏര്‍പ്പെടുത്തിയാല്‍ അവര്‍ നേരാനേരം ഈ പറഞ്ഞ കാലാവസ്ഥയും, ജലനിരപ്പും, കാട്ടുതീയുമൊക്കെ ഇതിലും ഭംഗിയായി പറഞ്ഞു തരില്ലേ? നിങ്ങളെ പോലോത്ത എഭ്യന്മാരെക്കാള്‍ വിവരവും ആത്മാഭിമാനവും ഈ പറഞ്ഞ കണിയാന്മാര്‍ക്കും മഷി നോട്ടക്കാര്‍ക്കും കാണും. കുറഞ്ഞ പക്ഷം അവര്‍ ചെയ്യുന്ന ജോലിയിലും അവരുടെ കഴിവിലും അവര്‍ക്ക് വിശ്വാസമുണ്ടല്ലോ.

നമ്മുടെ ഗവേഷകര്‍ക്കിടയില്‍ ഇത്തരമൊരു ചീഞ്ഞളിഞ്ഞ ആചാരം കുറേ കാലമായി തുടരുന്നതാണെന്നു ക്ഷേത്ര ഭാരവാഹികളുടെ വാക്കുകളില്‍ നിന്നും വ്യക്തമാവുന്നു. വിദ്യാഭ്യാസം നല്ലോണമുള്ള ഇത്തരം വിവരം കെട്ടവരെ വിളിക്കാന്‍ പറ്റിയ പേര് "ആകാശത്തേക്ക് വാണം വിടുന്നവര്‍ " ആണെന്ന് വിയെസ് കുറേ നാള്‍ മുന്നേ സൂചിപ്പിച്ചിരുന്നല്ലോ. ഇത്തരം ഉണ്ണാക്കന്മാരെ ശാസ്ത്രഞ്ജന്മാര്‍ എന്ന് വിളിച്ചാല്‍ ഇന്ത്യയുടെ അഭിമാനമായ മഹാന്മാരായ സര്‍ സിവി രാമന്‍, സത്യേന്ദ്രനാഥ് ബോസ്, രാമാനുജന്‍, ചന്ദ്രശേഖര്‍,... തുടങ്ങിയ ശാസ്ത്ര പ്രതിഭകളുടെ ആത്മാക്കള്‍ പോലും നമ്മോടു പൊറുക്കില്ല.

-**-

അന്നെക്സ്: ഈ റോകറ്റ് പൂജ ചെയ്തത് അന്ധവിശ്വാസത്തിന്റെ തലസ്ഥാനമായ അജ്മീര്‍ ദര്‍ഗയിലായാലും, വേളാംകണ്ണിയിലായാലും, എന്റെ അയല്‍പക്കത്തെ നാദാപുരം കുളശ്ശേരി ശിവ ക്ഷേത്രത്തിലായാലും എന്റെ സ്റ്റാന്റ് ഇത് തന്നെ. മതവും രാഷ്ട്രീയവും കൂട്ടിക്കുഴക്കുന്നത് രാഷ്ട്രത്തിന് ആപത്തു എന്നപോലെ തന്നെ അന്ധവിശ്വാസവും ശാസ്ത്രീയ ഗവേഷണവും കൂട്ടിക്കുഴക്കുന്നത് ശാസ്ത്രത്തിനും ആപത്തു തന്നെ.

ബോംബ്‌ വിചാരം - നാദാപുരം എഡിഷന്‍

2011-02-28T05:19:00.013Z

ഞെട്ടലോടെയാണ് ഇന്നലെ ആ വാര്‍ത്ത വായിച്ചത് "നാദാപുരത്ത് ബോംബ്‌ നിര്‍മാണത്തിനിടെ സ്ഫോടനം അഞ്ചു പേര്‍ മരിച്ചു". മരിച്ചവരുടെ ആവറേജ് പ്രായം ഇരുപത്തിയഞ്ചില്‍ താഴെ എന്നതാണ് അതിലെ ഏറ്റവും ദുഖകരമായ വസ്തുത. ഒരു പക്ഷെ പതിറ്റാണ്ടുകള്‍ പഴക്കമുള്ള നാദാപുരം പ്രദേശത്തിന്റെ ബോംബ്‌ നിര്‍മാണ ചരിത്രത്തിലെ ഏറ്റവും വലിയ ദുരന്തം എന്ന് തന്നെ വിശേഷിപ്പിക്കാം. (ഒരു നാദാപുരം പ്രവാസിയായ എനിക്ക് ഈ കാര്യം അറിഞ്ഞില്ലെന്നു നടിക്കാന്‍ പറ്റില്ല).

ബോംബ്‌ നിര്‍മ്മാണം, കൈവശം വെക്കല്‍, ഉപയോഗിക്കല്‍ എന്നീ കാര്യങ്ങള്‍ വലിയൊരു തെറ്റാണെന്ന് അങ്ങനെയങ്ങ് തറപ്പിച്ചു പറയാന്‍ ഒക്കുമോ...? അമേരിക്ക മുതല്‍ അഹിംസ മുഖമുദ്രയാക്കിയ ഇന്ത്യാ മഹാരാജ്യം വരെ അതിശക്തമായ ബോംബ്‌ ഉണ്ടാക്കുകയും പരീക്ഷിക്കുകയും ചെയ്തു എന്നതും, വിശക്കുമ്പോള്‍ പുഴുങ്ങിതിന്നാനല്ല ആവശ്യം വരുമ്പോള്‍ പൊട്ടിച്ചു മനുഷ്യരെ നശിപ്പിക്കാന്‍ തന്നെയാണ് ഇതിന്റെ ഉപയോഗം എന്നത് വെറുമൊരു വാസ്തവമാണ് എന്നിരിക്കെയും ചിലര്‍ക്ക് മാത്രം അത് പറ്റില്ല എന്ന ന്യായം തീര്‍ത്തും ബൂര്‍ഷ്വാ മനോഭാവം ആണെന്നതില്‍ സംശയമില്ല.

മേല്‍പ്പറഞ്ഞത്‌ പോലോത്തതും അതിലും വലുതുമായ ന്യായങ്ങള്‍ ലീഗു ചേരിയിലെയും സിപിഎം ചേരിയിലെയും സാമൂഹിക വിരുദ്ദര്‍ക്ക് പറയാന്‍ കാണും, മാത്രമല്ല "അത് ഉണ്ടാക്കരുത്, സൂക്ഷിക്കരുത്, ഉപയോഗിക്കരുത്" എന്ന ഗുരു വാക്യമോന്നും ഇരു പക്ഷവും ചെവിക്കൊള്ളാന്‍ പോകുന്നില്ല. "പ്ലാസ്റ്റിക്ക് മുക്ത" പഞ്ചായത്തിനു വേണ്ടി കാണിക്കുന്ന ആത്മാര്‍ഥത പോലും "ബോംബ്‌ മുക്ത" പഞ്ചായത്ത് /മേഖല എന്ന ആശയത്തിന് വേണ്ടി ഇരു കൂട്ടരും കാണിക്കുന്നില്ല എന്നത് വെറും യാതാര്‍ത്ഥ്യം മാത്രം.

ബോംബാക്രമണത്തില്‍ നാദാപുരം മേഖലയില്‍ ഇതുവരെ കൊല്ലപ്പെട്ടതിനേക്കാള്‍ പല മടങ്ങാണ് നിര്‍മ്മാണത്തിനിടയില്‍ നടന്ന മരണങ്ങള്‍ എന്ന വസ്തുത തെളിയിക്കുന്നത്, ബോംബിന്റെ ഉപയോഗമല്ല, നിര്‍മ്മാണമാണ് പ്രധാന വില്ലന്‍ എന്നതാണ്. നിര്‍മാതാക്കള്‍ക്കായി തികച്ചും പ്രായോഗികമായ ചില സജ്ജഷന്‍സ് താഴെ കൊടുക്കുന്നു.

ബോംബ്‌ നിര്‍മ്മാണം പഞ്ചായത്തിന്റെ മേല്‍നോട്ടത്തില്‍ നടത്തുക,
ഇതിനായി പ്രവര്‍ത്തി പരിചയമുള്ള പ്രോഫഷനുകളെ നിയമിക്കുക,
(ധൃതിയില്‍ ഉണ്ടാക്കുന്നതാണ് മിക്കപ്പോഴും അപകട കാരണം എന്നതിനാല്‍) അത്യാവശ്യ ഘട്ടത്തില്‍ ഉപയോഗിക്കാന്‍ കരുതല്‍ ശേഖരം ശക്തമാക്കുക,
പോലീസ് പിടിച്ചെടുക്കുന്ന ബോംബുകള്‍ ഒരു വില നിശ്ചയിച്ചു (അല്ലെങ്കില്‍ ലേലത്തിനു) പാര്‍ട്ടിക്കാര്‍ക്ക് നല്‍കുക,
പഞ്ചായത്തിന്റെ നേതൃത്വത്തില്‍ യുവാക്കള്‍ക്ക് ബോംബു നിര്‍മ്മാണ പരിശീലന കളരികള്‍ നടത്തുക,
ബോംബ്‌ നിര്‍മ്മാണം കുടില്‍ വ്യവസായമായി അന്ഗീകരിക്കുക,
ബോംബ്‌ നിര്‍മ്മാണ മേഖലയില്‍ വര്‍ക്ക് ചെയ്യുന്നവര്‍ക്ക് കുറഞ്ഞ പലിശ നിരക്കില്‍ വായ്പ്പ നല്‍കുക,
ബോംബ്‌ നിര്‍മ്മാതാക്കള്‍ക്ക് ഇന്‍ഷൂറന്‍സ് ഏര്‍പ്പെടുത്തുക

ഈ നിര്‍ദ്ദേശങ്ങള്‍ എത്രത്തോളം അപഹാസ്യവും അപ്രയോഗികവുമാണോ അതിലും മൂഢത്തരവും അപഹാസ്യവുമാണ് രണ്ടു മൂന്നു സര്‍വ കക്ഷി യോഗം വിളിച്ചാല്‍ ഇതിനൊക്കെ ഒരു പരിഹാരമാവും എന്ന് കരുതുന്നത്. തങ്ങള്‍ സുരക്ഷിതരാണ്‌ എന്ന് സാധാരണക്കാരായ ജനങ്ങള്‍ക്ക്‌ തോന്നാത്തിടതോളം കാലം ഈ ഒരു പ്രവണത തുടരുക തന്നെ ചെയ്യും.

"ബോംബുണ്ടാക്കുന്നവന്‍ ബോംബാല്‍..." എന്നത് മനസ്സിലാക്കാനുള്ള പ്രായമായവരല്ല ഈ ദുരന്തത്തില്‍ മരിച്ച മിക്കവരും. പക്ഷെ ഇനിയും ഒരുപാടു ജീവിക്കേണ്ട ജീവനുകള്‍ വല്ല തലതിരിഞ്ഞവന്റെയും നിര്‍ദ്ദേശപ്രകാരം ഇയ്യാംപാറ്റകളെ പോലെ എരിഞ്ഞടങ്ങുന്നത് കാണുമ്പോള്‍ വിഷമമുണ്ട് സുഹൃത്തെ.

"വേണ്ടാത്ത പണിക്കു പോയിട്ടല്ലേ" എന്ന് പറഞ്ഞു തള്ളാനല്ല തോന്നുന്നത്. അവരുടെ ചിന്താമണ്ഡലത്തിലും പരിതസ്ഥിതിയിലും നിന്ന് കൊണ്ട് ചിന്തിച്ചു നോക്കിയാല്‍ എന്താണ് അവര്‍ക്ക് ഇതിനൊക്കെ പ്രചോദനം ആകുന്നതെന്ന് മനസ്സിലാകും. എയിഡ്സ് രോഗം പിടിച്ച വേശ്യയെ "വേണ്ടാത്ത പണിക്കു പോയിട്ടല്ലേ" എന്ന് പറഞ്ഞു കുറ്റപ്പെടുത്താം. അതിനു പകരം അവളെ അതിലേക്കു നയിച്ച പരിതസ്ഥിതികള്‍ എന്തെല്ലാമെന്നു ഒന്ന് അന്വേഷിച്ചു അതിന്റെ മൂലകാരണം കണ്ടെത്തിയാല്‍ ഒരു പക്ഷെ ഒരു സമൂഹത്തെ തന്നെ എയ്ഡ്സില്‍ നിന്നും രക്ഷപ്പെടുത്താം എന്നത് തന്നെയാണ് ഈ ബോംബ്‌ നിര്‍മ്മാതാക്കളുടെ കാര്യത്തിലും പ്രായോഗികം. സദാചാരവും അഹിംസയും അച്ചടക്കവും പ്രസംഗിച്ചത് കൊണ്ട് കാര്യമില്ല. അത് പ്രാവര്ത്തികമാക്കുക എന്നതാണ് പരമപ്രധാനം.

"ഒരു മനുഷ്യനെ കൊന്നവന്‍ മനുഷ്യ കുലത്തിനെ മൊത്തം കൊന്നവനു തുല്യമാണെന്നു" പഠിപ്പിച്ച മുഹമ്മദ്‌ നബിയുടെ വാക്കുകള്‍ ഈ ഒരു അവസരത്തില്‍ ശ്രദ്ധേയം. നാദാപുരത്തും കണ്ണൂരിലും നിര്‍മ്മിക്കുന്ന ബോംബുകള്‍ ഇന്ത്യാരാജ്യത്തെ അല്ലെങ്കില്‍ മനുഷ്യ കുലത്തെ മൊത്തം നശിപ്പിക്കാനുള്ള ബോംബായി കണ്ടു വേണം ഇത്തരക്കാര്‍ക്കെതിരെ നടപടിയെടുക്കാന്‍. സര്‍ക്കാരിനെ ചിന്തിപ്പിക്കാന്‍ ഈ ഒരു ദുരന്തം കാരണമാകും എന്ന് പ്രതീക്ഷിക്കാം, ഒപ്പം നാദാപുരത്ത് ഇനി ബോംബിന്റെ ശബ്ദം മുഴങ്ങില്ലെന്നു നമുക്ക് പ്രത്യാശിക്കാം.

---

പി.കു: പാര്‍ട്ടിക്കാരുടെ, അറ്റ്‌ലീസ്റ്റ് പ്രാദേശിക/വാര്‍ഡു തല നെതാക്കളുടെയെങ്കിലും അറിവോടെയും ആശീര്‍വാദതോടെയുമല്ല ഈ കുന്ത്രാണ്ടങ്ങള്‍ ഉണ്ടാക്കുന്നത് എന്ന വാക്ക് വിശ്വസിക്കാന്‍ മാത്രം മണ്ടന്മാരാണോ പൊതു ജനം?
കേരളം മൊത്തം ബോംബു കൊണ്ട് ഗുണ്ടായിസം നടത്തുന്ന വന്‍കിടക്കാര്‍ക്ക് നാദാപുരത്തു മാത്രം ബോംബുണ്ടാക്കുന്ന ചെറുകിടക്കാരെ ഗുണദോഷിക്കാന്‍ എന്തവകാശം അല്ലെ ?

ഭ്രാന്തനും ദന്ത ഡോക്ടറും

2010-12-30T09:58:00.004Z

/റീപോസ്റ്റ്‌ /

അതി സരസന്മാരും ബുദ്ധിമാന്മാരുമായ ഭ്രാന്തന്മാരാല്‍ സമൃദ്ധമായിരുന്നു ഞങ്ങളുടെ നാടായ നാദാപുരം. ഭ്രാന്ത് ഒരു അസുഖമല്ല മറിച്ച് ഒരു കലയാണ്‌ എന്ന് ശക്തമായി വിശ്വസിക്കുകയും ഭ്രാന്തിനെ വളരെ ബുദ്ധിപൂര്‍വ്വം ഉപയോഗിക്കുന്നതില്‍ നിപുണനുമായിരുന്നു ഞങ്ങളുടെ പ്രദേശത്തെ തലമുതിര്‍ന്ന ഭ്രാന്തനായിരുന്ന കലന്തന്‍ .

ആള്‍ വെറും ഒരു മൂന്നാം കിട ഭ്രാന്തന്‍ ഒന്നുമല്ല, കെട്യോളും കുട്യേളും ഒക്കെയായി സ്വന്തം വീട്ടില്‍ താമസം, മോശമല്ലാതെ വേഷം, നല്ല ഐശ്വര്യമുള്ള മുഖഭാവം, ചുരുക്കിപ്പറഞ്ഞാല്‍ ഒരു ഫൈവ് സ്റ്റാര്‍ ഭ്രാന്തന്‍ . ഒരിക്കല്‍ ഇദ്ദേഹത്തെ കര്‍ണാടകയിലെ ഒരു മാനസികാരോഗ്യ കേന്ദ്രത്തില്‍ അഡ്മിറ്റ്‌ ചെയ്യാന്‍ ചെന്ന പോക്കര്‍ ഹാജിയെ അവിടെ അഡ്മിറ്റാക്കി കലന്തന്‍ മൂന്നാം ദിവസം നാട്ടിലെത്തിയത് തന്നെ ആളുടെ 'കൂര്‍മ്മഭ്രാന്തിനു' ഒരു ഉത്തമോദാഹരണമാണല്ലോ.

ഞാന്‍ ജനിക്കുന്നതിനു മുന്‍പേ ആള്‍ക്ക് പരലോകത്തേക്കു വിസ വന്നതിനാല്‍ ടിയാന്‍ സര്‍വീസ് അങ്ങോട്ടേക്ക് മാറ്റി. ഇത് കാരണം എനിക്ക് ഇദ്ദേഹത്തെ പറ്റി കേള്‍ക്കാനല്ലാതെ ദര്‍ശനസൗഭാഗ്യം ലഭിച്ചിരുന്നില്ല.

അന്നത്തെ ഇരിപ്പുവശം വച്ചു നോക്കിയാല്‍ എന്റെ പഠിപ്പ് വച്ചു സര്‍ക്കാര്‍ ഉദ്യോഗം ഒന്നും കിട്ടാന്‍ പോകുന്നില്ല, ഉള്ള സമയം വേസ്റ്റ് ആക്കാതെ അത്യാവശ്യം ആശാരിപണിയൊക്കെ പഠിച്ചാല്‍ ഭാവിയില്‍ ഉപകാരമാവും എന്ന ചിന്തയില്‍ ഹൈസ്കൂളില്‍ പഠിക്കുമ്പോള്‍ എന്റെ പ്രധാന ഹോബി അമ്മാവന്റെ വീട്ടുപണിക്ക് വേണ്ട ഫര്‍ണിച്ചറുകള്‍ ഉണ്ടാക്കുന്ന 'ജാഗ'യില്‍ ചെന്നിരുന്നു ആശാരിപണിയുടെ സൂത്രങ്ങള്‍ പഠിക്കലും, ഞങ്ങളുടെ സുഹൃത്തും മൂത്താശാരിയും ആയ രാജന്റെ പഴങ്കഥകള്‍ കേള്‍ക്കലുമായിരുന്നു. കലന്തന്റെ 'ഭ്രാന്തുസാമര്‍ത്യവും', സംഭവങ്ങള്‍ മസാല ചേര്‍ത്ത് അവതരിപ്പിക്കാന്‍ അപാര സിദ്ധി ലഭിച്ച ആശാരി രാജന്റെ കഴിവും ആയിരിക്കണം കലന്തന്റെ സ്ഥാനം എന്റെ മനസ്സില്‍ നാറാണത്ത് ഭ്രാന്തനെക്കാള്‍ ഒരു പടി മേലെയാക്കിയത്.

പത്ത് മുപ്പതു വര്‍ഷം മുന്‍പ് ഞങ്ങളുടെ നാട്ടുകാര്‍ മുറുക്കാനും (വെറ്റില) മറ്റും നന്നായി കഴിക്കുന്നതിനാലും, ദൈവം മനുഷ്യന്മാരെ ഇന്നതെതിലും ക്വാളിറ്റിയുള്ള പാര്‍ട്സ് ഉപയോഗിച്ച് സൃഷ്ടിച്ചിരുന്നതിനാലും, പല്ല് വേദന അക്കാലത്തു തീരെ പ്രചാരത്തില്‍ ഇല്ല എന്ന് തന്നെ പറയാം. അതായിരിക്കാം അന്ന് ദന്ത ഡോക്ടര്‍മാര്‍ക്ക് ഇന്നത്തെതിന്റെ ആയിരത്തിലൊന്ന് വില പോയിട്ട് ഒരു ശരാശരി ലാട വൈദ്യന്റെ സ്റ്റാറ്റസ് പോലും കിട്ടാതിരുന്നത്. പാന്റ്സും ഇട്ടു ഒരു ചെറിയ സ്യൂട്കെയ്സും തൂക്കി ടൌണിലെ ഏതെങ്കിലും ചായക്കടയില്‍ - ആഴ്ചകള്‍ പഴക്കമുള്ള - ഇംഗ്ലീഷ് പത്രവും വായിച്ചു കൊണ്ട് ഇരയെയും കാത്തിരിക്കുന്ന ദന്ത ഡോക്ടറെ ആവശ്യക്കാര്‍ വന്നു കാണുകയോ വീട്ടിലേക്കു കൂട്ടിക്കൊണ്ടു പോകാലോ ആണ് പതിവ്.

ഒരു ജൂലായ്‌ മാസം,

പതിവുപോലെ ഇരതേടി വന്ന ഡോക്ടര്‍ക്ക് ഇരുട്ടുന്നതു വരെ കാത്തിരുന്നിട്ടും കാര്യമായ ഇരയോന്നും തടഞ്ഞില്ല. പോരാത്തതിന് ശക്തമായ മഴയും, ചായക്കട അടക്കാറായപ്പോള്‍ ഒരു പരിപ്പ് വടയും ചായയും കഴിച്ചു അവിടുന്നു പുറത്തിറങ്ങിയ ഡോക്ടരുടെ അടുത്ത് കാഴ്ചയില്‍ മാന്യനെന്നു തോന്നുന്ന ഒരാള്‍ വന്നു അപേക്ഷിച്ചു, ഭാര്യ പല്ല് വേദനയായി ഞെരിപിരി കൊള്ളുകയാണ്, ഡോക്ടറെ ഇവിടെ കണ്ടിരുന്നു എന്ന് ഒരാള്‍ പറഞ്ഞിട്ട് തെടിയിറങ്ങിയതാണ്. ഒരു ഇരയെ കിട്ടിയ സന്തോഷത്തില്‍ സമയം ഇരുട്ടാരായി എന്നതൊന്നും ഗൌനിക്കാതെ ഡോക്ടര്‍ അതു സ്വീകരിച്ചു.

അങ്ങനെ ഡോക്ടരുടെ കുടയുടെ തണലില്‍ രണ്ടുപേരും മഴനനയാതെ ഏകദേശം രണ്ടു കിലോമീറ്റെര്‍ നടന്നു കാണണം. ഒരു അടച്ചിട്ട കടയുടെ അടുത്തെത്തിയപ്പോള്‍ മാന്യന്‍ പറഞ്ഞു, ഇനി വഴി അല്പം മോശമാണ്, ഞാന്‍ വീട്ടില്‍ ചെന്ന് ടോര്‍ച്ചുമായി വരാം, കടയില്‍ ഡോക്ടറോട് വെയിറ്റ് ചെയ്യാന്‍ പറഞ്ഞു ഡോക്ടരുടെ കുടയും വാങ്ങി ആള്‍ പോയി.

ഡോക്ടര്‍ക്ക് കാത്തിരുന്നു മടുത്തു, ആള്‍ വരുന്ന ലക്ഷണമില്ല, ആകെ ടെന്‍ഷന്‍ അടിച്ചു ഇരിക്കുമ്പോഴാണ് തന്റെ കടയില്‍ അപരിചിതനെ അസമയത്ത് കണ്ട കടയുടമ പാറേമ്മല്‍ കേളപ്പന്‍ തൊട്ടടുത്ത വീട്ടില്‍ നിന്നും ഒരു റാന്തല്‍ വിളക്കുമായി ഇറങ്ങി വന്നു കാര്യം തിരക്കുന്നത്. ഡോക്ടരുടെ വിശദീകരണത്തില്‍ നിന്നും ഡോക്ടറെ കൂട്ടി വന്ന ആ മാന്യന്‍ 'ഭ്രാന്തന്‍ കലന്തന്‍' ആണെന്ന് മനസ്സിലാക്കാന്‍ കേളപ്പന് അധികം ആലോചിക്കേണ്ടി വന്നില്ല. ഡോക്ടര്‍ വിഡ്ഢിയാക്കപ്പെട്ടു എന്നും സമയം കളയാതെ സ്ഥലം വിട്ടു കൊള്ളാനും നിര്‍ദേശിച്ചു.

ഡോക്ടര്‍ക്ക് ദേഷ്യവും സങ്കടവും ഒരുമിച്ചാണ് വന്നത്, ബുദ്ധിമാനായ ഡോക്ടറെ അതും ഒരു ഭ്രാന്തന്‍ പറ്റിക്കുക എന്നൊക്കെ പറഞ്ഞാല്‍. ഇതില്‍പരമൊരപമാനമില്ലപ്പോ എന്ന് മനസ്സില്‍ പറഞ്ഞ് ഡോക്ടര്‍ പോലീസ് സ്റ്റേഷനില്‍ ചെന്ന് ഒരു പരാതി ബോധിപ്പിച്ചു. കലന്തന്‍ തന്നെ കബളിപ്പിച്ചു, തന്റെ കുടയും കയ്യിലുള്ള അഞ്ഞൂറ് രൂപയും ആള്‍ മോഷ്ടിച്ചു.

പിറ്റേന്ന് രാവിലെ രണ്ടു പോലീസുകാര്‍ കേളപ്പന്റെ കടയുടെ മുന്നില്‍ നിന്നും ചുറ്റിത്തിരിയുന്നു, കാര്യം തിരക്കിയപ്പോള്‍ ഡോക്ടര്‍ പ്രതികരിച്ചു എന്ന് ജനം മനസ്സിലാക്കി. അവര്‍ കലന്തനെ പൊക്കാന്‍ വന്നതാണ്, കലന്തന്‍ ഒരു മടിയും കൂടാതെ അവരുടെ ഒപ്പം സ്റ്റേനിലേക്ക് പോയി. ആള്‍ക്ക് ബോറടി മാറ്റാന്‍ വീണുകിട്ടിയ അവസരമാനല്ലോ.

പോലീസ് കലന്തനെ കാര്യങ്ങള്‍ ധരിപ്പിച്ചു. കുട ഇല്ലഞ്ഞിട്ടാണ് ഡോക്ടറെ ഒപ്പം കൂട്ടിയതെന്നു കലന്തന്റെ ന്യായം. കുടയും കാശും എവിടെ എന്ന ചോദ്യത്തിന് കുട വീട്ടിലുണ്ട് നിങ്ങള്‍ തിരക്കു കൂട്ടിയതിനാലാണു എടുക്കാന്‍ മറന്നതെന്നും രൂപയില്‍ ഇരുനൂറു കേളപ്പനും, ഇരുനൂറു സ്വന്തം ഭാര്യക്കും നൂറു അമ്മതിനും കൊടുത്തു എന്നും പറഞ്ഞു. കാഴ്ചയില്‍ ഭ്രാന്തനാനെന്നോന്നും തോന്നാത്തതിനാല്‍ പോലീസ്കാര്‍ അതു വിശ്വസിച്ചു.

അധികം വൈകിയില്ല വീണ്ടും രണ്ടു പോലീസ്കാര്‍ കേളപ്പന്റെ കടക്കു മുന്നില്‍, അവര്‍ക്ക് കിട്ടേണ്ടത് കലന്തന്റെ ഭാര്യ, കേളപ്പന്‍, അമ്മദ് എന്നിവരെയാണ്, മൂന്നു പേരും സ്റ്റേഷനില്‍ എത്തി. തൊണ്ടി മുതലായ രൂപ എവിടെ എന്ന ചോദ്യം കേട്ടു അവര്‍ ആകെ ഞെട്ടി - എന്ത് രൂപ ഏത് രൂപ എന്നായി അവര്‍.

കാര്യങ്ങള്‍ പന്തിയല്ലെന്ന് കണ്ട കലന്തന്‍ 'സാമാന്യഭ്രാന്തു' വീണ്ടെടുത്ത് കാര്യങ്ങള്‍ വിശദീകരിച്ചു തുടങ്ങി. സത്യത്തില്‍ ഞാന്‍ പൈസ എടുത്തിട്ടില്ല ഈ ഡോക്ടര്‍ തന്നെ വിഡ്ഢിയാക്കിയത്തിലുള്ള പകതീര്‍ക്കാന്‍ കെട്ടിച്ചമച്ചതാണ്, അതിന്റെ ശിക്ഷ ഞാന്‍ എന്റെ ശത്രുക്കള്‍ക്ക് വീതിച്ചു കൊടുത്തു - എന്നെ ഒറ്റി കൊടുത്ത കേളപ്പന്‍ (പിഴ ഇരുനൂറു രൂപ), സമയത്തിന് ഭക്ഷണം തരാത്ത ഭാര്യ ആയിശു (പിഴ ഇരുനൂറു രൂപ), വഴിയില്‍ കാണുമ്പോള്‍ കളിയാക്കുന്ന അമ്മത് (പിഴ നൂറു രൂപ). ഇന്നെങ്ങാന്‍ കലന്തന്‍ ഉണ്ടായിരുന്നെങ്കില്‍ തന്നെ പറ്റി ബ്ലോഗ്‌ എഴുതിയതിനു കുറഞ്ഞത്‌ നൂറു രൂപ എങ്കിലും എനിക്കും ഫൈന്‍ ഇടുമായിരുന്നു.

***

ഇത്രയും ബുദ്ധിമാന്മാരുമായ ഭ്രാന്തന്‍മാര്‍ അധികം ഉണ്ടാകാന്‍ തരമില്ല, ആളുടെ സാമര്‍ത്ഥ്യം കണ്ടിട്ടാവാം എന്റെ ഉപ്പാപ്പാന്റെ അനുജന്‍ - പായുന്നതിന്റെ കുട്ടി പറക്കും എന്ന വിശ്വാസത്തില്‍ - അങ്ങേരുടെ മകളെ കല്യാണം കഴിച്ചത്.

===***===
//റീപോസ്റ്റ്‌ //

ബ്ലോഗുസ്സിഹാം (ബ്ലോഗ് മാന്ത്രികം)

2010-12-21T10:01:00.003Z

രണ്ടു മൂന്നു മാസമായി പോസ്റ്റൊന്നും ഇടാന്‍ പറ്റുന്നില്ല. ബൂലോകത്തേക്ക് എങ്ങിനെ തിരിച്ചു വരും എന്ന് എത്ര ആലോചിച്ചിട്ടും ഒരു എത്തും പിടിയും കിട്ടുന്നില്ല. കണ്ണില്‍ കണ്ട ബ്ലോഗുകളെല്ലാം വായിച്ചും കമന്റുകളിട്ടും താല്‍ക്കാലിക ആശ്വാസം കണ്ടെത്തി ദിവസങ്ങള്‍ തള്ളി നീക്കിക്കൊണ്ടിരിക്കുമ്പോള്‍ രണ്ടു നാള്‍ മുന്‍പ് ശ്രദ്ധെയന്റെ ബ്ലോഗിലെ അദ്ധേഹത്തിന്റെ ശ്രദ്ധേയമായൊരു പോസ്റ്റ്‌ എന്റെ ശ്രദ്ധയില്‍ പെട്ടു.

മലയാളിയായ ഒരു പാവം ഹൈടെക് അറബി സിദ്ധനെയും അയാളുടെ തരികിടകളെയും കുറിച്ച് വിശദമായി തന്നെ പ്രതിപാധിക്കുന്നുണ്ട്. കാര്യം തട്ടിപ്പൊക്കെ ആണെങ്കിലും ഇനി അഥവാ ബിരിയാണി കൊടുക്കുന്നുണ്ടെങ്കിലോ എന്നു കരുതി ബ്ലോഗില്‍ നിന്നും കിട്ടിയ സിദ്ധന്റെ വെബ്സൈറ്റ് വായിക്കുകയും വൈകാതെ ഇമെയില്‍ വഴി ഞാന്‍ സിദ്ധനുമായി ബന്തപ്പെട്ടു.

അദ്ധേഹത്തെ എന്റെ ബ്ലോഗു ദുഖങ്ങള്‍ ബോധിപ്പിച്ചപ്പോള്‍ മുസ്ല്യാര്‍ അല്പസമയം മൗനത്തിലാണ്ടു - പിന്നെ പറഞ്ഞു തുടങ്ങി "കഴിഞ്ഞ പോസ്റ്റില്‍ ഇമെയില്‍ അയക്കുന്നവരെ തെറി വിളിച്ച വകയിലുള്ള ശത്രു ദോഷവും ഒപ്പം ആഹാരത്തെ പറ്റി എഴുതിയ വകയിലുള്ള കണ്ണേറും ഒന്നിച്ചു വന്നത് സകല പ്രശ്നങ്ങല്‍ക്കും കാരണമായി"

ബ്ലോഗര്‍മാര്‍ക്കായി അദ്ധേഹം "ബ്ലോഗുസ്സിഹാം" എന്ന പേരില്‍ ഒരു ഏലസ്സ് "ജാവ സ്ക്രിപ്റ്റ്" രൂപത്തില്‍ തയാരാക്കിയെന്നും അതു ബ്ലോഗിലിട്ടാല്‍ പിന്നെ ഈ ദോഷം മാറുമെന്നു മാത്രമല്ല ബ്ലോഗിന് വച്ചടി ഉയര്‍ച്ചയായിരിക്കുമെന്നും പറഞ്ഞു. ക്രെഡിറ്റ്‌ കാര്‍ഡ് വഴി പണം അയച്ചാല്‍ ഇമെയില്‍ വഴി സ്ക്രിപ്റ്റ് അയക്കാമെന്നു വാക്ക് തന്നു.

"ബ്ലോഗുസ്സിഹാമിന്റെ" ഫലശുദ്ധിയില്‍ എനിക്ക് സംശയം തോന്നിയില്ലെങ്കിലും എന്റെ ചില ചോദ്യങ്ങളില്‍ പന്തികേട്‌ തോന്നിയ അദ്ദേഹം അതിനു തെളിവായി നിരവധി ഉദാഹരണങ്ങള്‍ കാണിച്ചു തന്നു, കണ്ണൂരാന്‍, ഹംസ തുടങ്ങി എന്തിലധികം പറയുന്നു സാക്ഷാല്‍ ബെര്‍ളി വരെ അദ്ധേഹത്തിന്റെ കസ്റ്റമേഴ്സ് ആണെന്നും, അടുത്തകാലത്തായി വിശാല മനസ്കന്റെ ബ്ലോഗില്‍ പുതിയ പോസ്റ്റുകള്‍ അധികം വരാത്തത് അദ്ദേഹം കൊടുത്ത ഏലസ്സ് നിരസിച്ച കാരണത്താലാണു - എന്നിവ അതില്‍ ചിലതു മാത്രം.

ഇത്രയുമായപ്പോള്‍ അധികം ആലോചിച്ചില്ല ഞാനും വാങ്ങി ഒരു ഏലസ്സ്. ബ്ലോഗുസ്സിഹാമിന്റെ ജാവാസ്ക്രിപ്റ്റ് എന്റെ ബ്ലോഗില്‍ അപ്-ലോഡ് ചെയ്തു. അതിട്ടപ്പോള്‍ തന്നെ ബ്ലോഗിനൊരു ഉണര്‍വ്വ്... ഇത്രയും തങ്കപ്പെട്ട ആ സിദ്ധനെയല്ലേ ആ ചങ്ങായി കരിനാക്ക് വളച്ചു കുറ്റം പറഞ്ഞത്.
====

വായനക്കാര്‍ക്ക് വഴിപോക്കന്റെ ഒരായിരം ക്രിസ്തുമസ് ആശംസകള്‍ !!!

മംഗോളിയയിലെ ഉച്ചഭക്ഷണം

2010-08-09T10:19:00.005+01:00

കേരളത്തോട്, കേരളീയ ഭക്ഷണത്തോടും സ്നേഹം തോന്നണമെങ്കില്‍ നാം കേരളത്തിന്‌ പുറത്തു പോകണം. ലോകത്ത് (കേരളത്തിനു പുറത്തു) എവിടെയായിരുന്നാലും ഭക്ഷണക്കാര്യത്തില്‍ മലയാളിയുടെ പ്രഥമ പ്രിഫറന്‍സ് ഇന്ത്യന്‍ ഭക്ഷണം തന്നെ. ദശാബ്ദങ്ങള്‍ വിദേശത്ത് താമസിച്ചാലും ഇന്ത്യന്‍ (അല്ലെങ്കില്‍ ഇന്ത്യക്കാര്‍ ഉണ്ടാക്കിയ) വിഭവങ്ങളല്ലാതെ തദ്ദേശീയ ഭക്ഷണമോ, അല്ലെങ്കില്‍ ദുബായ്, ലണ്ടന്‍ പോലോത്ത ലോകത്തിന്റെ നാനാ ഭാഗങ്ങളിലുമുള്ള ആളുകള്‍ താമസിക്കുന്ന സ്ഥലങ്ങളില്‍ ജീവിക്കാനുള്ള സുവര്‍ണാവസരം ലഭിച്ചിട്ടും വിവിധ നാട്ടുകാര്‍ ഉണ്ടാക്കുന്ന അവരുടെ തദ്ദേശീയ ഭക്ഷണം വല്ലപ്പോഴും ഒന്ന് പരീക്ഷിക്കാനോ നമ്മള്‍ മലയാളികള്‍ പൊതുവേ ശ്രമിക്കാറില്ല.

വിദേശത്ത് ഇങ്ങിനെയൊക്കെ ആണെങ്കിലും നാട്ടിലെത്തിയാല്‍ പിസ, ഷവര്‍മ, ബര്‍ഗര്‍, കബാബ്, പൈ, പാസ്ത, സൂഷി എന്നിവയോട് വല്ലാത്തൊരു അഭിനിവേശം നമ്മള്‍ പലര്‍ക്കും തോന്നും. പക്ഷെ അതെല്ലാം - ഇന്ത്യന്‍ ആക്സെന്റില്‍ പറയുന്ന ഇംഗ്ലീഷ് പോലെ - ഇന്ത്യന്‍ രുചിയില്‍ ഉണ്ടാക്കിയ മേല്‍പ്പറഞ്ഞവയോട് സാമ്യതയുള്ളവ മാത്രം എന്നതല്ലേ ശരി?

വിദേശങ്ങളില്‍ താമസിക്കുമ്പോഴും ഇന്ത്യന്‍ ഭക്ഷണം കഴിക്കാന്‍ എന്നെ പ്രേരിപ്പിക്കുന്ന കാരണങ്ങള്‍ പലതാണ്, ഉദാഹരണത്തിന് ചൈനീസ് തായ്‌ ഭക്ഷണങ്ങളുടെ ഒടുക്കത്തെ എരിവും സ്മെല്ലും, യൂറോപ്യന്‍ ഭക്ഷണ നിര്‍മാതാക്കള്‍ ഉപ്പ്, എരിവു തുടങ്ങിയവയോട് കാണിക്കുന്ന ശക്തമായ വിരോധം, കൊറിയക്കാര്‍ പട്ടിയെ തിന്നും (പണ്ട് ദേശാഭിമാനി എഴുതിയത് പോലെ അല്ല) എന്ന അന്ധവിശ്വാസവും പിന്നെ ഇവരും വിയട്നാം, ജപ്പാന്‍ എന്നിവിടങ്ങളിലെ ആള്‍ക്കാരും കഴിക്കുംപോലെ രണ്ടു കമ്പുകള്‍ (chopsticks) കൊണ്ട് ഭക്ഷണം കഴിക്കാനുള്ള അറപ്പും ഒക്കെ അവയില്‍ ചിലത് മാത്രം.

കമ്പ് കാണുമ്പോഴുള്ള അറപ്പിന്റെ കാരണം എന്റെ ഒരു കൊറിയന്‍ സുഹൃത്ത്‌ വിവരിച്ചു തന്ന കമ്പിന്റെ ചരിത്രമാണ്: പണ്ടുകാലത്ത് ഇന്ന് കമ്പ് ഉപയോഗിച്ച് ഭക്ഷണം കഴിക്കുന്നവര്‍ മഹാ ദാരിദ്ര്യത്തിലും പട്ടിണിയിലും കഴിഞ്ഞപ്പോള്‍ ജീവിക്കാന്‍ വേണ്ടി -നമ്മുടെ നാട്ടില്‍ കുറുക്കന്‍ ഞണ്ടിനെ പിടിക്കുമ്പോലെ- ചെറിയ കമ്പ് ഞണ്ട്, ഉറുമ്പ്‌, മറ്റു പ്രാണികള്‍ എന്നിവയുടെ മാളത്തില്‍ ഇട്ടു അവറ്റകളെ കബളിപ്പിച്ച് പിടിച്ചു തിന്ന കാലം ഉണ്ടായിരുന്നു. പിന്നെ കാശും പെരുമയുമൊക്കെ ആയപ്പോഴും ഈ സ്പൂണൊക്കെ എന്നാ ഉണ്ടായേ.... നമ്മള്‍ വന്നവഴി മറക്കരുത്... എന്നൊക്കെ പറഞ്ഞു അതൊരു ജീവിതരീതി ആയി മാറി എന്നൊക്കെയാണ്. അതോടെ എനിക്ക് കമ്പ് കാണുമ്പോള്‍ പ്രാണികളെ തിന്നുന്ന രംഗം മനസ്സില്‍ വരും, അതോടെ എല്ലാ രസവും പോകും.

ഭക്ഷണം കഴിക്കുമ്പോള്‍ പലര്‍ക്കും തോന്നുന്ന ചില വിചാരങ്ങളാണ്: "ഇതില്‍ അല്പം പുളി കൂടിപ്പോയി, കുറച്ചു ഏലക്കാ ചേര്‍ക്കണമായിരുന്നു, ആവശ്യമായ ഉപ്പു പാചകത്തിന് മുന്‍പേ ചെര്‍ക്കനമായിരുന്നു, അല്പം ഇഞ്ചി കൂടി ഇട്ടിരുന്നെങ്കില്‍ നന്നായിരുന്നു (അങ്ങനെ കണ്ണാടിയില്‍ ഇഞ്ചി തിന്ന കുരങ്ങിനെ കാണാന്‍ ഒരു അവസരവും കിട്ടും), ഇതു ഒലിവ് ഓയിലില്‍ ഉണ്ടാക്കിയാല്‍ പെര്‍ഫെക്റ്റ്‌ ആയിരിക്കും, കറപ്പത്തോല്‍ ഇട്ടിരുന്നെങ്കില്‍ ഈ കറി സൂപ്പര്‍ ആയിരുന്നു," ഇങ്ങിനെ ഇങ്ങിനെ ഒരുപാട് വിചാരങ്ങള്‍.

വീട്ടില്‍ നിന്നും സാദാരണ ഇത്തരം വിചാരങ്ങള്‍ വികാരങ്ങള്‍ക്ക് വഴിമാറി പറക്കുംതളിക പോലോത്ത പലതും പ്രത്യക്ഷപ്പെട്ടെന്നിരിക്കും. പക്ഷെ പുറത്തു നിന്ന് കഴിക്കുമ്പോള്‍ സ്വാഭാവികമായി ഇത്തരം വിചാരങ്ങള്‍ വിവേകത്തിനു വഴിമാറും. വല്ലതും എറിഞ്ഞു പൊളിച്ചാല്‍ നമ്മള്‍ തന്നെ കാശ് കൊടുക്കനമെന്നേ... നമ്മുടെ തടി, കീശ എന്നിവ കേടാകാതെ നമ്മള്‍ തന്നെ നോക്കുന്നതാണല്ലോ അതിന്റെയൊരു ഭംഗി.

ഈ പറഞ്ഞ എല്ലാ പ്രശ്നങ്ങള്‍ക്കും ഒരു ഒറ്റമൂലി ഇന്നലെ കാണാന്‍ ഇടയായി അതു വായനക്കാരുമായി പങ്കു വെക്കാം എന്ന് കരുതിയാണ് ഇത് പോസ്റ്റുന്നത്‌. ഒക്ലാന്റിലേക്ക് സ്ഥലം മാറിപ്പോകുന്ന ഞങ്ങളുടെ ഒരു സുഹൃത്തിനു യാത്രയപ്പ് നല്‍കാന്‍ ഞങ്ങളുടെ സുഹൃത്തും സമൂഹ്യപ്രവര്‍ത്തകനും ആയ ചെറിയാന്‍ അങ്കിള്‍ സെലക്ട്‌ ചെയ്തത് "ഗിന്ജിസ്-GINJIS" എന്ന് പേരുള്ള ഒരു പരമ്പരാഗത മംഗോളിയന്‍ രെസ്ടോരന്റ്.

മംഗോളിയ എന്ന് കേട്ടപ്പോള്‍, ജെങ്കിസ് ഖാന്‍ മണ്ണാങ്കട്ട എന്നൊക്കെയായി മുന്‍പ് ചരിത്ര പുസ്തകങ്ങളില്‍ കണ്ടതും, തിരശ്ചീന എഴുത്തില്‍ നിന്നും വിഭിന്നമായി മുകളില്‍ നിന്നും താഴോട്ടാണ് അവന്മാര്‍ എഴുതുക എന്ന് പണ്ടാരോ പറഞ്ഞു കേട്ടതും എന്റെ മനസ്സില്‍ മിന്നി മറഞ്ഞു. ഇന്ന് മംഗോളിയ എന്ന പേര് ഭൂപടത്തില്‍ അല്ലാതെ സ്വാഭാവികമായി എവിടെയും ഞാന്‍ കാണാറില്ല , അവരെ പറ്റി എന്തെങ്കിലും പരദൂഷണം കണ്ടു പിടിക്കാം എന്നതും എന്നില്‍ GINJIS രെസ്ടോരന്റ് കൌതുകം ഉണര്‍ത്തി.

അധികം വാചകമടിക്കാതെ നമുക്ക് വെല്ലിംഗ്ടനിലെ ഗിന്ജിസ്ന്റെ അകത്തേക്ക് കടക്കാം, ആ ഒറ്റമൂലി കാണണ്ടേ.

വെജ്, മീറ്റ്‌, സീഫൂഡ് ഇങ്ങിനെയുള്ള സെക്ഷനുകളിലായി നൂറു കൂട്ടം അസംസ്കൃത വിഭവങ്ങള്‍ ശീതീകരിച്ച അറകളില്‍ നിരത്തിയിരിക്കുന്നു. അതിനടുതതായി ഒട്ടനവധി സ്പൈസ് ഐടംസ്, പിന്നെ പലതരം സോസ് ഒപ്പം അര വേവില്‍ രണ്ടുമൂന്നു തരം റൈസ് കൂടാതെ ഡിസ്സേര്‍ട്ട് ഉണ്ടാക്കാന്‍ വേണ്ട മറ്റീരിയല്‍സ്, അങ്ങിനെ നീണ്ടു കിടക്കുന്ന ഭക്ഷണം ഉണ്ടാക്കാന്‍ വേണ്ട അസംസ്കൃത വസ്തുക്കളുടെ ഒരു നിര തന്നെ.

കുറച്ചു മാറി, ഒരു ഹലാകിന്റെ നരകത്തിനു മേലെ ഒന്നുരണ്ടു മീറ്റര്‍ വ്യാസമുള്ള വൃത്താകൃതിയിലുള്ള ഇരുമ്പു കല്ല്‌. രണ്ടു വന്‍ ഫോര്‍ക്കുകളുമായി അതിനു ചുറ്റും റോന്തു ചുറ്റുന്ന ഒരു മംഗോളിയന്‍ ഭീകരന്‍ (പാചകക്കാരന്‍ )

നമ്മള്‍ ചെയ്യേണ്ടത് അസംസ്കൃത വസ്തുക്കളില്‍ നിന്നും എന്തൊക്കെ വേണം എങ്ങിനെയൊക്കെ മിക്സ് ചെയ്യണം എന്ന് സ്വയം അങ്ങ് തീരുമാനിക്കുക. തീരുമാനം അത്ര പെട്ടെന്ന് വേണമെന്നില്ല ഒരു തീരുമാനം എടുക്കുവോളം വിശപ്പിനെ പിടിച്ചു നിര്‍ത്താന്‍ അവിടെ പലതരം സൂപ്പുകളുണ്ട്‌ അതിനു കൂട്ടാന്‍ ബ്രഡും. വിശന്നു കൊണ്ട് നല്ലൊരു തീരുമാനം എടുക്കാന്‍ പ്രയാസമാണെന്ന് മങ്കോളിയക്കാരന് പോലും അറിയാമെന്നു ചുരുക്കം.

നമുക്ക് വേണ്ട പച്ചക്കറി, മത്സ്യ, മാംസാദികള്‍, എണ്ണ, സ്പൈസ്, ഉപ്പ്, സോസ്, കുന്തം, കുടച്ചക്രം തുടങ്ങി റൈസ് വരെ ആവശ്യമുള്ളത്ര എടുത്തു കപ്പുകളില്‍ നിറച്ച ശേഷം അതുമെടുത്ത് ആ നരകത്തിനു അടുത്തിരിക്കുന്ന ഭീകരന് കൊടുക്കുക. അയാള്‍ നമുക്കാവശ്യമായ വേവില്‍ ഇവയൊക്കെ പാകം ചെയ്തു തരും. കഴിച്ച ശേഷം കൊള്ളാം ഇനിയും വേണമെന്ന് തോന്നിയാല്‍ വീണ്ടു സെലക്ട്‌ ചെയ്തു കഴിക്കാം അല്ലെങ്കില്‍ വേറെ കോമ്പിനേഷന്‍ ശ്രമിക്കാം. എന്ത് തിന്നുന്നു എന്നതോ എത്ര തിന്നുന്നു എന്നതോ ഇവിടെ പ്രസക്തമല്ല.

ഇനി അതിനൊപ്പം വേണ്ട പാനീയങ്ങള്‍ സെലക്ട്‌ ചെയ്യാം അതിനു മാത്രം വില വേറെ കൊടുക്കണം. മൂക്ക് മുട്ടെ തിന്ന ശേഷം വായില്‍ രണ്ടു വിരലിടാന്‍ സ്ഥലം ബാക്കിയുണ്ടെങ്കില്‍ അതു ഫില്‍ ചെയ്യാന്‍ ഇഷ്ടപ്പെട്ട ഡിസ്സേര്‍ട്ട് ഉണ്ടാക്കേണ്ട വസ്തുക്കള്‍ സെലക്ട്‌ ചെയ്തു കൊടുത്താല്‍ അതും ആ നരകത്തിനു മേലെ വച്ചു ഉണ്ടാക്കി തരും. അതിനു കൂട്ടാന്‍ പലതരം സ്വീറ്റ് സോസുകള്‍ വേറെ. പിന്നേം സ്ഥലം ബാക്കിയുണ്ടെങ്കില്‍ അതു ഫില്‍ ആക്കാന്‍ അഞ്ചു പത്ത് തരം ഐസ്ക്രീം.

ഈ പറഞ്ഞ ഐറ്റംസ് ഒക്കെ കഴിച്ചു കയിഞ്ഞപ്പോള്‍ ബില്ല് ആകാശം മുട്ടുമെന്നൊക്കെ പേടിയുണ്ടായിരുന്നു, പക്ഷെ വില വെറും ഇരുപതു ഡോളര്‍ മാത്രം. വിവരമുള്ള പാചകക്കാരന്‍ വേണ്ട, മെനു വേണ്ട വിളംബാന്‍ ആള് വേണ്ട ഇതൊക്കെയാവാം വിലക്കുറവിനു കാരണം.

ആശയക്കുഴപ്പം ഉണ്ടാക്കുന്ന പ്രിന്റെഡ്‌ മെനുവിലെ ഭക്ഷണം എന്നതില്‍ നിന്നും വിഭിന്നമായി നാം തന്നെ സെലക്ട്‌ ചെയ്ത നാം തന്നെ ഡിസൈന്‍ ചെയ്ത ഭക്ഷണം കഴിച്ച സംതൃപ്തി, നമുക്കും കുക്ക് ചെയ്യാമെന്ന ആത്മവിശ്വാസം ഇങ്ങിനെ എന്തൊക്കെ മെച്ചങ്ങള്‍. എല്ലാറ്റിനും ഉപരിയായി പോക്കറ്റ് കാലിയായില്ല എന്നൊരു സമാധാനവും.

PSTD09AUG2010YK2117NZDT

ദുര്‍ഗന്ധം പരത്തുന്ന ഇമെയിലുകള്‍

2010-08-04T05:11:00.006+01:00

ആദ്യം തന്നെ കാര്യമങ്ങു പറഞ്ഞേക്കാം,

ഇനി മുതല്‍ വല്ലോരും മാന്യമായി എനിക്ക് ഫോര്‍വേഡ് മെയില്‍ അയക്കുമ്പോള്‍ അവരുടെ "To" ഫീല്‍ഡില്‍ മാക്സിമം ഒരു ഇമെയില്‍ ഐഡി മാത്രമേ ഉണ്ടാകൂ. കവി ഉദ്ദേശിച്ചത് സുഹൃത്തുക്കളെയോ, സഹപാടികളെയോ, സഹപണിയാന്മാരെയോ, വെല്ലിംഗ്ടന്‍ മലയാളികളെയോ അല്ല എന്ന് ഇതിനാല്‍ സാക്ഷ്യപ്പെടുത്തുന്നു. ഇതൊരു അറിയിപ്പായി എടുക്കുമല്ലോ - പിന്നീട് കവി എന്നെയാണ്, എന്നെത്തന്നെയാണ്, എന്നെ മാത്രമാണ് ഉദ്ദേശിച്ചത് എന്ന് പരാതിപ്പെട്ടിട്ട് ഒരു കാര്യമില്ല.

മെയില്‍ അയക്കുന്നതിലല്ല പ്രശ്നം. അവരുടെ അഡ്രസ്സ് ബുക്കിലുള്ള എല്ലാവരുടേയും പേരുകള്‍ "To"/"Cc" ഫീല്‍ഡില്‍ കുത്തി നിറച്ചു അതിലുള്ള എല്ലാവര്‍ക്കും പരസ്പരം മെയില്‍ ഐഡികള്‍ ഷെയര്‍ ചെയ്യാന്‍ തക്ക വണ്ണം അയക്കുന്നു എന്നതാണ്. അതു പിന്നീട് കാന്‍സര്‍ പോലെ നിയന്ത്രനാതീതമാവുന്നു. "Bcc" ഫീല്‍ഡില്‍ മെയില്‍ ഐഡികള്‍ ഇട്ടാല്‍ ഈ പ്രശ്നം ഒഴിവാക്കാം.

To ഫീല്‍ഡില്‍ നൂറുകണക്കിന് ഐഡികള്‍ക്കൊപ്പം എന്നേയും ഉള്‍പ്പെടുത്തി മെയില്‍ അയക്കുന്നവരോട് ആ പ്രവണത ഒഴിവാക്കാന്‍ ആദ്യമൊക്കെ ഞാന്‍ സ്വകാര്യമായി മാന്യമായി പറയാറുണ്ട്‌. പക്ഷെ ഒരു ഫലവും കാണുന്നില്ല.

കാര്യമായി ഇത്തരം മയില്‍ വരുന്നത് ബ്ലോഗര്‍മാരില്‍ നിന്നാണ്, ആരെങ്കിലും വല്ല ബ്ലോഗും എഴുതി എന്ന് വച്ചു അതു വായിക്കാന്‍ വഴിയെ പോകുന്നവര്‍ക്കൊക്കെ ഇമെയില്‍ അയക്കേണ്ട വല്ല ആവശ്യവും ഉണ്ടോ? കൊള്ളാവുന്നതാണെങ്കില്‍ ആള്‍ക്കാര്‍ അങ്ങോട്ട്‌ ചെന്ന് വായിക്കും. അല്ലെങ്കില്‍ തന്നെ ഇഷ്‌ടം പോലെ അഗ്രഗേടര്‍ ഉള്ള ഇക്കാലത്ത് അതിന്റെ എന്താവശ്യം ?

വിശാലമനസ്കന്റെയും കൊച്ചുത്രെസ്യയുടെയും മുതല്‍ പുത്തന്‍ ബ്ലോഗ്‌മുറയിലെ ഹംസ-കണ്ണൂരാന്മാരുടെ ബ്ലോഗുകള്‍ വരെ ജനം വന്നു വായിക്കുന്നത് ഇങ്ങനെ വല്ല ക്ഷണവും ഉണ്ടായിട്ടാണോ ? നല്ല ബ്ലോഗുകള്‍ ആള്‍ക്കാര്‍ സ്വയം ക്ഷണിഞ്ഞു വന്നു വായിച്ചു അതിനു തെളിവെന്നോണം നൂറു കണക്കിന് കമെന്റ് ഇട്ടു പോകുന്നത് തന്നെ ഇതിനു തെളിവല്ലേ.

ബ്ലോഗര്‍മാര്‍ മാത്രമല്ല പ്രശ്നം, ---അവര്‍ 'കൊച്ചുകുട്ടികള്‍' ഒക്കെയായിരിക്കും എന്നൊക്കെ വച്ചുങ്ങ് സഹിക്കാം--- വേറെ ചിലര്‍, ഇസ്ലാം, ഇന്ത്യ, പ്രകൃതി തുടങ്ങിയവ നിലനില്‍ക്കുന്നത് ഇവരുടെ ഇമെയില്‍ ഫോര്‍വേര്‍ഡുകള്‍ ‌കൊണ്ടാണ് എന്നൊരു വിശ്വാസം ഉള്ളതുപോലെ (?) കണ്ട ആളുകളുടെ ID മൊത്തം അടിച്ചു കയറ്റി മെയില്‍ അയക്കല്‍ സ്ഥിരം ഏര്‍പ്പാട് ആയപ്പോള്‍ പല തവണ പലരോടും ഞാന്‍ പറഞ്ഞു സുഹൃത്തേ ഈ ഇമെയില്‍ ഐഡി ഷെയറിംഗ് ഒന്ന് നിര്‍ത്തിക്കൂടെ, ഒരു രക്ഷയുമില്ല പിന്നേം ചങ്കരര്‍ തെങ്ങില്‍ തന്നെ. വിവരമില്ലാത്തവരാനെങ്കില്‍ ക്ഷമിക്കാം പക്ഷെ പലരും കുറഞ്ഞ പക്ഷം GMAIL പോലോത്ത ഒന്ന് സ്വന്തമായി വികസിപ്പിക്കാന്‍ പോലും പറ്റുന്നത്ര വിവരമുള്ളവര്‍ - ഇത്തരം ആളുകള്‍ ഇങ്ങിനെ ഛെയ്യുമ്പോള്‍ എങ്ങിനെ പ്രതികരിക്കാതിരിക്കും?

ഇന്‍ബോക്സില്‍ കുമിഞ്ഞു കൂടുന്ന ചവറു മെയിലുകള്‍ കാരണം സഹികെട്ട ഒരു പാവം ജിമെയില്‍ ഉപയോക്താവിന്റെ അപേക്ഷയാണിത്. വല്ലവരെയും വേദനിപ്പിച്ചെങ്കില്‍ ചോദിച്ചു വാങ്ങിയ ഒരു പ്രഹരമായി കരുതി അതങ്ങ് ക്ഷമിക്കെടെയ്.

കുഞ്ഞിക്കണ്ണന്റെ പേരും രൂപയുടെ ചിഹ്നവും

2010-07-21T14:07:00.000+01:00

രൂപയുടെ പുതിയ ചിഹ്നം പ്രസിദ്ധീകരിച്ച ദിനം തന്നെയാണ് ഞാന്‍ കണ്ണൂരുകാരന്‍ കുമാരന്റെ ബ്ലോഗിലെ പേര് മാറ്റിയ കുഞ്ഞിക്കണ്ണനെ വായിച്ചത് എന്നത് തികച്ചും യാദ്രിശ്ചികം മാത്രം. കണ്ട കള്ള് ചെത്തുകാര്‍ക്കും, ലോട്ടറി വില്പനക്കാര്‍ക്കും കാണാറുള്ള "കുഞ്ഞിക്കണ്ണന്‍ " എന്ന പേര് മാന്യനും സുന്ദരനുമായ ആള്‍ക്ക് വന്നതിലെ വിഷമവും, സമൂഹത്തില്‍ ഒരു വില കിട്ടാന്‍ വേണ്ടി പേര് "സൂരജ്" എന്ന് മാറ്റിയതും കുമാര്‍ തന്റെ സ്വതസിദ്ധമായ ഹാസ്യം കൈവിടാതെ അവതരിപ്പിച്ചിരിക്കുന്നു.

ഇതേ അവസ്ഥ തന്നെയായിരുന്നു നമ്മുടെ രൂപക്കും എന്നാണ് ഞാന്‍ ഇപ്പോള്‍ മനസിലാക്കുന്നത്‌, കണ്ട കൂതറ പാക്കിസ്ഥാനികളും, ബംഗാളികളും, ശ്രീലങ്കകാരും ഉപയോഗിക്കുന്നതും രൂപ തന്നെ, സ്വന്തമായി ഒരു ലാബല്‍ ഇല്ലാത്ത കാരണത്താല്‍ രൂപയ്ക്ക് ഒരു വിലയും ഇല്ലായിരുന്നു. നടുറോഡില്‍ കണ്ടാല്‍ പോലും അതു വല്ല പാക്കി/ലങ്കന്‍ രൂപയുമാനെന്ന ധാരണയില്‍ കുനിയുന്നത് വെസ്റ്റാനെന്നു കരുതി പിച്ചക്കാര്‍ വരെ എടുക്കാരുണ്ടായിരുന്നില്ല. ഇതിനൊരു ഉദാഹരണം ആണല്ലോ രണ്ടു കോടി രൂപ സമ്മാനമുണ്ട് എന്ന് പറഞ്ഞാലും ആളുകള്‍ അയ്യേ രൂപയല്ലേ എന്ന് പറഞ്ഞു മൈന്‍ഡ് ചെയ്യാത്തതിനാല്‍ ലോട്ടറിക്കാര്‍ രാപ്പകല്‍ ലോട്ടറി വില്‍ക്കാന്‍ ആളുകളുടെ പിന്നാലെ തെണ്ടി നടക്കുന്നത്.

സാമ്പത്തിക ശാസ്ത്രഞ്ഞനും ബുദ്ധിമാനുമായ സര്‍ദാര്‍ജി ഈയിടെ അതിനെ പറ്റി കൂലങ്കഷമായി ചിന്തിച്ചു. രണ്ടു വര്‍ഷം മുന്‍പ് വരെ ഒരു യൂറോക്ക് ആയിരം കോടി സിംബാവെ ഡോളര്‍, എന്ന് വച്ചാല്‍ പുല്ലിന്റെ വിലപോലുമില്ലാത്ത സിംബാവെ നാണയം ഡോളറിന്റെ പേര് ഉപയോഗിചിട്ടായിരിക്കാം അടുത്തിടെ ഡോളറിന്റെ മൂല്യം വല്ലാതെ ഇടിഞ്ഞതും അതുവഴി അമേരിക്കന്‍ സാമ്പത്തിക പ്രതിസന്തിയും.

ഇതില്‍ നിന്നും പാഠം ഉള്‍ക്കൊണ്ടു ഇന്ത്യന്‍ രൂപയ്ക്ക്, മറ്റു രൂപയുടെ കൂട്ടത്തില്‍ നിന്നും ഏതു പൊട്ടനും തിരിച്ചറിയാന്‍ പുതിയ ചിഹ്നം കണ്ടെത്തിയിരിക്കുന്നു. ഇനി ഇന്ത്യന്‍ രൂപയുടെ വില റോക്കറ്റ് പോലെ ഉയരുന്നത് നമുക്ക് കാണാം. മൂന്നാല് വര്‍ഷം കൊണ്ട് ആയിരം ഡോളറിനു അര രൂപ എന്ന നിരക്കിലായിരിക്കും വിനിമയ നിരക്ക്. മാത്രമല്ല ഓയില്‍ എക്സ്പോര്ട്ടിംഗ് രാജ്യങ്ങള്‍ ഇനി മുതല്‍ അവരുടെ ഇടപാട് രൂപയിലാക്കും എന്നും വിശ്വസിക്കാം.

ഇനി എന്റെ ന്യായമായ ഒരു ചോദ്യം‍, ഇന്ത്യന്‍ രൂപയും പാക് രൂപയും തിരിച്ചറിയാനാവാത്ത കൂതരകള്‍ ആണോ നമ്മുടെ രൂപയുടെ മൂല്യം കൂട്ടാന്‍ പോകുന്ന ആളുകള്‍? സിങ്കപ്പൂര്‍ മുതല്‍ സിംബാവെ വരെ ഡോളര്‍ എന്ന പേര് മാത്രമല്ല ചിഹ്നം വരെ ഉപയോഗിച്ചിട്ടും എന്തേ ഇന്നും ഡോളര്‍ നില നില്‍ക്കുന്നു ? ഇറാക്കിലും ഉപയോഗിക്കുന്നത് കുവൈത്തില്‍ ഉപയോഗിക്കുന്ന അതെ ദീനാര്‍ എന്ന പേരാണ്, എന്നിട്ടും എന്ത് കൊണ്ട് അവരുടെ വില കുറയുന്നില്ല? അല്ലേലും ചിത്രം നോക്കിയാണോ മൂല്യം കൂടുന്നത് - ആണെങ്കില്‍ അതെനിക്ക് പുതിയ അറിവാണ്.

ഇത്തരം വസ്തുനിഷ്ടമായ കാര്യം ചര്‍ച്ച ചെയ്യാതെ, ഒരു ചിഹ്നം കിട്ടിയത് ആഘോഷിക്കുകയും, ഒപ്പം തങ്ങളുടെ അവസരോചിതവും ബുദ്ധിപരവുമായ പ്രവര്‍ത്തനം കൊണ്ട് ആ ചിഹ്നം (എന്തായാലും ചിഹ്നം ആയ സ്ഥിതിക്ക് അതു ഒന്ന് ടൈപ്പ് ചെയ്യാന്‍ ആര്‍ക്കും ആഗ്രഹം കാണുമല്ലോ) ടൈപ്പ് ചെയ്യാന്‍ ഒരു ഫോണ്ട് വികസിപ്പിച്ച പിള്ളേരെ അഭിനന്ദിക്കുന്നതിനു പകരം അവരോടു അസൂയപ്പെട്ടിട്ടും, അതു യൂണികോഡ് അല്ല മണ്ണാങ്കട്ടയല്ല എന്നൊക്കെ പറഞ്ഞു അവരെമേല്‍ കുതിര കയറിയിട്ടും എന്ത് കാര്യം ?

പുതിയ ചിഹ്നം കൊണ്ട് രൂപയുടെ മൂല്യമോ , ബ്രാണ്ട്മൂല്യമോ കുറയില്ല പക്ഷെ കൂടുകയുമില്ല

--*---*--

"പുതുമൊഴി: രൂപ ഏതായാലും ചിഹ്നം നന്നായാല്‍ മതി "

എലിപ്പെട്ടി

2010-07-15T21:05:00.000+01:00

എന്റെ മറ്റു വിക്റ്റിംസിന് കൊടുക്കാത്ത ഒരു ആനുകൂല്യം ഞാന്‍ നിങ്ങള്‍ക്ക് തരികയാണ്. അമ്പും വില്ലും കൊണ്ട് ചാകണോ, അതോ മലപ്പുറം കത്തി വേണോ...... ? "നാടോടിക്കാറ്റി"ലെ പവനാഴിയില്‍ നിന്നല്ലാതെ ഇങ്ങനെ ഇരകള്‍ക്ക് ഓപ്ഷന്‍ കൊടുക്കുന്ന ഒരു സംവിധാനം ഈ തിങ്കളാഴ്ച വരെ ഞാന്‍ കേട്ടിരുന്നില്ല. തിങ്കളാഴ്ചത്തെ ആ ഭീകര സംഭവം നടക്കുന്നതോ, ലോകത്തില്‍ ഏറ്റവും സമാധാനമുള്ള രാജ്യം എന്ന് ചിലര്‍ പറയുന്ന ന്യൂസിലാന്റിലും.

പോസ്സം(*possum, കാണാന്‍ ഏകദേശം മരപ്പട്ടി പോലെയിരിക്കും), എലി എന്നീ ജീവികളോടു ന്യൂസിലാണ്ടിന്റെ മനോഭാവം അമേരിക്കക്ക് ബിന്‍ലാദനോടു എങ്ങനെയാണോ അതു പോലെ തന്നെയാണ്. ഇവറ്റകളെ പിടിച്ചു കൊടുത്താല്‍ കാശ് കിട്ടും എന്നൊക്കെയാണ് പറഞ്ഞു കേട്ടത്. പട്ടികളെ പേടിയായതിനാല്‍ മരപട്ടിയെ ഞാന്‍ ഒഴിവാക്കി, പിന്നെയുള്ളത് എലി, പക്ഷെ ഒന്നിനെ പിടിക്കണമെങ്കില്‍ കണ്ടു കിട്ടണ്ടേ.

ഭാഗ്യം എന്നല്ലാതെ എന്ത് പറയാന്‍. ഈ കഴിഞ്ഞ ശനിയാഴ്ച ഞങ്ങളുടെ അടുക്കളയില്‍ ദേ കിടക്കുന്നു ഒരു മുട്ടന്‍ എലി, എണ്ണയിട്ടു മിനുക്കിയ പോലോത്ത ശരീരം, നീണ്ട വാല്‍, ഐശ്വര്യമുള്ള മുഖം, ചുറുചുറുക്കുള്ള നോട്ടം... യുറേക്കാ... എന്നും പറഞ്ഞു ഞാന്‍ എന്റെ സഹവീടന്‍ കം ഗൃഹനാഥന്‍ (flatmate and‌ landlord) ആയ സായ്പ്പിനെ കാര്യം അറിയിച്ചു. ആള്‍ ആ ഭീകര ജീവിയെ കാണാന്‍ ഓടിയെത്തി. അപ്പോഴേക്കും "CID എസ്കേപ്" എന്നൊന്നും പറയാതെ അതു അപ്രത്യക്ഷമായി. ഒരു മണിക്കൂറോളം ശ്രമിച്ചെങ്കിലും അതിനെ പിടിക്കാനുള്ള ഞങ്ങളുടെ ഒരു ശ്രമവും വിജയിച്ചില്ല.

പിറ്റേന്ന് ഞായറാഴ്ച, അതു പിന്നെ ഉറക്കം, കറക്കം എന്നിങ്ങനെയായി പോയി. തിങ്കളാഴ്ച ആപ്പീസില്‍ പോയി, മോണിംഗ് ടീ, ലഞ്ച്, ഈവിനിംഗ് ടീ എന്നിവ കൃത്യ നിഷ്ടതയോടെ ചെയ്ത ശേഷം വീട്ടില്‍ വിളിച്ചു കുറെ സംസാരിച്ചു, പിന്നെ സുഹൃത്തുക്കളുമായുള്ള ചാറ്റിംഗ് ഇങ്ങനെ വലിയ വലിയ കാര്യങ്ങളൊക്കെ ചെയ്തു തളര്‍ന്നു വീട്ടില്‍ വന്നപ്പോള്‍ സഹവീടന്‍ അക്ഷമയോടെ കാത്തിരിക്കുന്നത് പോലെ തോന്നി. എന്നെ കണ്ടപാടെ ആള്‍ അഭിമാനത്തോടെ പറഞ്ഞു. ഇന്ന് രാത്രിയോടെ എലിയെ പിടിക്കാനുള്ള എല്ലാ സംവിടാനങ്ങളും ഒരുക്കിയിട്ടുണ്ട്. തന്റെ ബുദ്ധിപരമായ എലിപിടുത്ത വിദ്യ കാണിക്കാന്‍ ആള്‍ എന്നെ അടുക്കളയില്‍ കൂട്ടിക്കൊണ്ട് പോയി.

അവിടെ രണ്ടു എലികത്രികകള്‍. ഒന്നില്‍ ചോക്ലേറ്റ്, മറ്റേതില്‍ ചീസ്‌. കൂടാതെ ഒരു പാത്രത്തില്‍ എലി വിഷം കപ്പലണ്ടി ബട്ടറില്‍ മിക്സ്‌ ചെയ്തിട്ടും മറ്റേതില്‍ ബ്രെഡ്ഢില്‍ മിക്സ്‌ ചെയ്തിട്ടും. ഇതിനു പുറമേ അതിനെ തല്ലിക്കൊല്ലാന്‍ ഒരു മുട്ടന്‍ വടിയും. എലി രക്ഷപ്പെടാനുള്ള എല്ലാ പഴുതുകളും അടച്ചിരിക്കുന്നു.

ഒരു എലിക്കു ചാവാന്‍ ഇതില്പരമെന്തു വേണം ? ഭക്ഷണക്കാര്യത്തില്‍ എപ്പൊഴും ഒരു വരൈറ്റി (ടേസ്റ്റ് ഒന്നും ഇല്ലെങ്കിലും) കീപ്‌ ചെയ്യുന്ന ആ സായിപ്പ് പവനാഴിയെ വെല്ലുന്നൊരു മെനു എലിയെ പിടിക്കാന്‍ ഉണ്ടാക്കിയതില്‍ സ്വയം അഭിമാനിക്കുകയാണ്.

ഒരു ശരാശരി സായ്പിന് സാമാന്യ ബുദ്ധി എന്ന സാധനം ശരാശരി മലയാളിയുടെ അന്‍പതില്‍ ഒന്നേ ഉള്ളൂ എന്നാണല്ലോ ഈയിടെ നടന്ന ഒരു സര്‍വേ** പറയുന്നത്. സത്യത്തില്‍ എനിക്കാ രാത്രി ഉറക്കം വന്നില്ല. കാരണം എലിയെ പിടിക്കാന്‍ ഇല്ലം ചുടാനും മടിക്കാത്തവനാ കക്ഷി, വേറൊന്നും കൊണ്ടല്ല.

ഇപ്പോള്‍ എന്റെ സംശയം വേറൊന്നാണ്‌. ദിലീപിന്റെ "പറക്കും തളിക" എന്ന പടം youtube-ല്‍ കണ്ടു കൊണ്ടിരിക്കെ വെള്ളം എടുക്കാന്‍ അടുക്കളയില്‍ പോയപ്പോള്‍ പോളിത്തീന്‍ കവര്‍ കണ്ടു എനിക്ക് (അത്‌ എലിയാണെന്ന്) തോന്നിയതാവുമോ. പുറത്ത് പറഞ്ഞാല്‍ ആ സായ്പ്പ് എലിവിഷം എന്നെ കൊണ്ട് തിന്നിച്ചാലോ ... വെറുതേ എന്തിനു പത്രക്കാര്‍ക്ക് പണി കൊടുക്കണം അല്ലേ.

-------------------------------------------------------

**Note: ഒരു ശരാശരി മലയാളിയായ ഞാനും ഒരു ശരാശരി സായിവ്‌ ആയ എന്റെ ഗൃഹനാഥനും മാത്രം ഉള്‍പ്പെട്ട, ഞാന്‍ സ്വയം നടത്തിയ സര്‍വേ ആണ്. വേറെ ഒരു സായിവിനും ഈ രക്തത്തില്‍ പങ്കില്ല. അല്ലേല്‍ തന്നെ ആസ്ത്രേലിയക്കാര്‍ സ്ക്രൂഡ്രൈവര്‍ ഒക്കെ കൊണ്ട് ഇന്ത്യക്കാരെ കുത്തുന്നത് കണ്ടിട്ട് ഇവരും എന്നെയിട്ടു പെരുമാറാന്‍ വല്ല കാരണവും നോക്കി ഇരിക്കുകയാ.

വെള്ളൂര്‍ : ഒരു യാത്രയയപ്പിന്റെ കഥ

2010-06-15T10:31:00.001+01:00

നാദാപുരത്ത് നിന്നും കഷ്ടിച്ച് രണ്ടു കിലോമീറ്റര്‍ പോയാല്‍ എത്തുന്ന പ്രകൃതി രമണീയമായ ഒരു പ്രദേശമാണ് വെള്ളൂര്‍. കഷ്ടിച്ചു എന്നുദ്ദേശിച്ചത് വേനല്‍ക്കാലത്തെ പൊടിയും മഴക്കാലത്തെ ചെളിയും നിറഞ്ഞ വഴിയിലൂടെയുള്ള നടത്തം ഉദ്ദേശിച്ചാണ്.

ആറ്റുനോറ്റുണ്ടായ ഒരു ചെറുമകന്‍ എന്ന നിലക്കുള്ള എല്ലാ ആനുകൂല്യങ്ങളും പരമാവധി ചൂഷണം ചെയ്യാനായി, ചെറുപ്പത്തില്‍ ഞാന്‍ വെള്ളൂരിലെ ഉമ്മാന്റെ വീട്ടില്‍ താമസിച്ചിരുന്നതിനാല്‍ എനിക്കീ പ്രദേശവുമായി നല്ല ബന്ധമാണ്. വേള്ളൂരിലെ ആള്‍ക്കാര്‍ പൊതുവേ നല്ലവരാണ്, മോശക്കാരാണെന്ന് പറഞ്ഞാല്‍ കാരണവന്‍മ്മാര്‍ അങ്ങോട്ട്‌ അടുപ്പിക്കാത്തത് കൊണ്ടോ, എന്നെക്കാള്‍ തടിമിടുക്കും ആരോഗ്യവുമുള്ള ആണ്‍കുട്ടികള്‍ അവര്‍ക്ക് ഉള്ളത് കൊണ്ട് പേടിച്ചിട്ടു പറയുന്നതോ ഒന്നുമല്ല.

ഇവരുടെ പ്രാദേശിക ബോധം അല്പം ഓവറാണ്. ഭാരതം, കേരളം, എന്തിനു ദുബായ് എന്ന് കേള്‍ക്കുപ്പോള്‍ പോലും തോന്നാത്ത ആവേശമാണ് ഇവര്‍ക്ക് വെള്ളൂര്‍ എന്ന് കേട്ടാല്‍. ഏതൊരു കാര്യത്തിലും വെള്ളൂര്‍ ഒരു പണത്തൂക്കം മുന്നിലാണെന്ന് തെളിയിക്കാന്‍ ഇവിടതുക്കര്‍ക്കുള്ള വൈദഗ്ദ്യം ഒന്ന് വേറെ തന്നെയാണ്.

ഫോര്‍ എക്സാമ്പിള്‍, രണ്ടു വര്‍ഷം മുന്‍പ് മലപ്പുറത്ത്‌ നടന്ന ഒരു വന്‍ ബാങ്ക് കവര്‍ച്ചയില്‍ പ്രതിയായ ഒരു സ്ത്രീയുടെ തറവാട് വെള്ളൂര്‍ ആണ് എന്നറിഞ്ഞപ്പോള്‍ ഇവിടത്തെ രോമാമുള്ളവര്‍ക്ക് രോമാഞ്ചവും അതില്ലാത്തവര്‍ക്ക് തോലാഞ്ചവും ഉണ്ടായി എന്നാണു അനുഭവസ്ഥര്‍ പറഞ്ഞത്. ആഗോള താപനം, ആണവ റിയാക്ടര്‍ തുടങ്ങി ആവണക്കെണ്ണയെ പറ്റി വരെ ഇവിടത്തെ പിഞ്ചു കുട്ടികള്‍ അടക്കം കേറി അഭിപ്രായം പറയും‌.

ഇരട്ടപേരില്ലാത്ത ആള്‍ക്കാര്‍ ഇവിടെ കുറവാണ് നാട്ടിലെ ഒരു വിധം ആള്‍ക്കര്‍ക്കെല്ലാം ചിരിക്കുകയും ചിന്തിപ്പിക്കുകയും ചെയ്യുന്ന ഇരട്ടപേരുണ്ട്. ഇഴജന്തുക്കള്‍, പക്ഷികള്‍, മത്സ്യങ്ങള്‍, പാത്രങ്ങള്‍, ലോഹങ്ങള്‍, തുടങ്ങി അത്യാധുനിക ഇലക്ട്രോണിക് ഉപകരണങ്ങളുടെ വരെ പേരുകള്‍ ഇവര്‍ക്ക് ഇരട്ടപേരിടാനുള്ള അസംസ്കൃത വസ്തുവാണ്.

നാട്ടുകാര്‍ പൊതുവേ ദുബായ്, ഖത്തര്‍, ബഹറിന്‍ എന്നീ പ്രദേശത്ത് ജോലി നോക്കി പോകുന്നതിനാല്‍ അതൊക്കെ ഇവിടെ സര്‍വസാദാരണം. പക്ഷെ വല്ലോരും കൊല്ലം, കൊച്ചി അല്ലെങ്കില്‍ തിരുവനന്തപുരം ഒക്കെ പോകുകയാണെങ്കില്‍ അതൊരു മഹാ സംഭവമാക്കി നാട്ടില്‍ അതൊരു ചര്‍ച്ചാ വിഷയമായിരിക്കും.

രണ്ടായിരാമാണ്ടിലെ ഒരു ദിവസം വെള്ളൂര്‍ക്കാര്‍ ഉണരുന്നത് ഒരു അത്ഭുത വാര്‍ത്ത കേട്ടാണ്. എന്റെ ഏറ്റവും ഇളയ കാരണവന് (കാരണവര്‍ എന്ന് പറയാന്‍ മാത്രം പ്രായ വ്യത്യാസം ഞാന്‍ ആളുമായി ഇല്ല) കൊല്ലത്ത് ഒരു ട്രെയിനിംഗ് കോളേജില്‍ ബി-എഡിന് സീറ്റ് കിട്ടിയിരിക്കുന്നു. അതും ഒരു ഗവര്‍മെണ്ട് സ്ഥാപനത്തില്‍. കാലണ ചിലവില്ലാതെ ഗവര്‍ണ്മെന്റിന്റെ ചിലവില്‍ പഠിക്കാനുള്ള ഒരു അവസരം കിട്ടിയാല്‍ ഇല്ലം വിറ്റും കൊല്ലത്ത് പോകണം എന്നാണു നാട്ടിലെ വിവരമുള്ളവര്‍ പറഞ്ഞത്. പിന്നെ കൂടുതലൊന്നും ആലോചിചില്ല. അങ്ങിനെ ക്ലാസ് തുടങ്ങുന്നതിന്റെ രണ്ടു ദിവസം മുന്‍പ് തന്നെ കൊല്ലത്തേക്ക് പോകാന്‍ ഡേറ്റ് തീരുമാനിച്ചു.

കൊല്ലത്തേക്ക് പോകുന്ന "കാരണവനെ" നിറ മിഴികലോടെയാണ് നാട്ടുകാര്‍ യാത്രയയച്ചത്, ബി-എഡ് കഴിയുന്നതുവരെ ആള്‍ ഇനി വെള്ളൂരില്‍ കാണില്ല എന്ന നിലക്കാന് യാത്രയയപ്പ് നല്‍കിയത്. യാത്രയയപ്പില്‍ പ്രസംഗിച്ച ചിലരുടെ കരച്ചില്‍ കേട്ട് യാത്രയയപ്പ് യോഗം നടന്ന സ്കൂളിന്റെ അയലത്ത് കെട്ടിയ മൂസ ഹാജിയുടെ പശു കെട്ടുംഅറ്റിച്ചു ഓടി എന്നും ഒക്കെയാണ് പിന്നീടറിഞ്ഞത്‌. മീന്‍സ്, അത്രയും ഹൃദയസ്പര്‍ഷവും വികാരഭാരിതവുമായിരുന്നു യാത്രയയപ്പ് എന്ന് തന്നെ.

വിധിയുടെ കിടപ്പ് വശം മറ്റൊന്നായിരുന്നു. ചില സാങ്കേതിക കാരണങ്ങളാല്‍ ക്ലാസ് ഒരു മാസം കഴിഞ്ഞേ തുടങ്ങൂ എന്നാണ് ആദ്യ ദിവസം ക്ലാസ്സില്‍ നിന്നും അറിയിപ്പുണ്ടായത്‌ (ഗവര്‍മെണ്ട്‌ സ്ഥാപനമല്ലേ, ഓസിനു പഠിക്കുന്നവര്‍ അത്ര പഠിച്ചാല്‍ മതി എന്ന് ഗവര്‍മെണ്ട്‌ കരുതിക്കാണും).

നാട്ടില്‍ പോയാല്‍ ഇത്രയും സംഭവബഹുലമായി യാത്രയയച്ചവരുടെ മുഖത്ത് എങ്ങിനെ നോക്കും ഇന്ന ഒരേയൊരു കാരണത്താല്‍ ആള്‍ കൊല്ലത്ത് തന്നെ ഒരു വീട് വാടകക്കെടുത്തു ഉള്ളതും തിന്നു ആ ഒരു മാസം അവിടെ തന്നെയങ്ങ് തങ്ങി.

കൊല്ലത് പോയി വെറും ഒരൊറ്റ ദിവസം നിന്നപ്പോള്‍ തന്നെ ഒന്നൊന്നര മാസം ലീവ് ഉണ്ടായിട്ടും നാട്ടില്‍ സ്വന്തം ഇല്ലത്ത് പോകാതെ അവിടെ താമസിക്കുന്ന എന്റെ കാരനവനെ കണ്ടു തെറ്റിദ്ധരിച്ച ഒരു പഴഞ്ചന്‍ പറഞ്ഞ വാക്കാണ്‌ ‌ "കൊല്ലം കണ്ടവനില്ലം വേണ്ട" എന്ന പഴമൊഴി എന്നാണിപ്പോള്‍ വെള്ളൂരിലെ ആള്‍ക്കാര്‍ പറയുന്നത്.

അങ്ങനെ വെള്ളൂരിന്റെ മഹാത്മ്യത്തില്‍ ചാര്‍ത്താന്‍ ഒരു പൊന്‍തൂവല്‍ കൂടി ഇവിടത്തുകാര്‍ക്ക് കിട്ടി എന്ന് ചുരുക്കം.

വീണ്ടും ചില വീട്ടു കാര്യങ്ങള്‍

2009-10-24T05:55:00.000+01:00

ഓട്ടോറിക്ഷ റോഡില്‍ നിന്നും വെട്ടിക്കുന്നത് പോലെ പ്രവചനാതീതമായ ന്യൂസിലാന്‍ഡിലെ കാലാവസ്ഥയില്‍, യാത്ര ആവുന്നത്ര കുറക്കാമല്ലോ എന്ന് കരുതിയാണ് ഓഫീസിനു അടുത്തുള്ള ഒരു വീട്ടില്‍ സഹവീടന്റെ (flatmate) ഒരു ഒഴിവുണ്ട് എന്ന് കേട്ടപ്പോള്‍ ഒരു കാര്‍ വാങ്ങുന്നത് വരെ നല്ല ഒരു ഓപ്ഷന്‍ ആണെന്ന നിലക്ക് അതിനോട് താല്പര്യം തോന്നിയത്‌.

അതിന്റെ ഉടമസ്ഥനായ കിവിയുടെ [ന്യൂസിലാന്ഡ്കാരെ പൊതുവേ അങ്ങനെയാണല്ലോ വിളിക്കാറ്] കൂടെ ഷെയര്‍ ചെയ്തു ഉപയോഗിക്കണം. കിടപ്പ് മുറി വേറെ വേറെ ഉണ്ടെങ്കിലും ബാക്കിയെല്ലാം - ടോയിലറ്റ് അടക്കം - ഷെയര്‍ ചെയ്യണം എന്നൊക്കെയാണ് ചട്ടം.

വീടിനെ പറ്റി സുഹൃത്ത്‌ വിവരിച്ചത് കേട്ടപ്പോള്‍ താജ് മഹലിന്റെ അത്രയൊന്നും വരില്ലെങ്കിലും മൈസൂര്‍ കൊട്ടാരത്തെക്കാള്‍ ബെറ്റര്‍ ആയിരിക്കും എന്ന് തോന്നി. മാത്രമല്ല, അവിടുത്തെ ഗൃഹനാഥന്‍ (landlord) ഒരു മഹാനായ മനുഷ്യനാണെന്നും, സ്ഥലത്തെ പ്രധാന മാന്യന്മാരില്‍ ഒരാളാണെന്നും ഒക്കെയാണ് സുഹൃത്ത്‌ പറഞ്ഞു തന്നത്. ടൌണില്‍ വച്ച് ഒരു വൈകുന്നേരം ആ മാന്യനെ ഒന്ന് കണ്ടു.

ആള്‍ ജോലി ചെയ്യുന്നത് ഒരു UK ബെയ്സ്ഡ്‌ കമ്പനിയില്‍ ആണ് - അതും ഓണ്‍ലൈന്‍ ആയി. മൂങ്ങകളെ പോലെ പകല്‍ ഉറക്കം രാത്രി ജോലി.. കേട്ടപ്പോള്‍ എനിക്ക് വല്ലാത്ത അസൂയ തോന്നി..രാവിലെ ഉറങ്ങാന്‍ ഉള്ള ഒരു സുഖം ഒന്ന് വേറെ തന്നെയല്ലേ? രാവിലെ കഷ്ടപ്പെട്ട് എണീക്കുന്നതിനു പകരം സുഖമായി മൂടിപ്പുതച്ചു കിടന്നുറങ്ങാമല്ലോ..എന്തൊരു ഭാഗ്യം സിദ്ധി്ച്ചവന്‍ ! ആ ഭാഗ്യവാനോട് കുറച്ചു നേരം സംസാരിച്ച ശേഷം അടുത്ത ദിവസം വീട് കാണാന്‍ വരാം എന്ന് പറഞ്ഞു ഞങ്ങള്‍ തിരിച്ചു..

പിറ്റേന്നു തന്നെ ആ മണി മാളിക കാണാന്‍ വേണ്ടി പുറപ്പെട്ടു - ആ മാന്യന്‍ എന്നെയും സുഹൃത്ത് ദിലോവരെയും അകത്തേക്ക് കൂട്ടിക്കൊണ്ടു പോയി. ചരിത്രാതീത കാലത്ത് പണിത ഒരു വീട്. പതിനെട്ടാം നൂറ്റാണ്ടില്‍ ന്യൂസിലാന്‍ഡില്‍ ബ്രിട്ടീഷുകാര്‍ വന്നപ്പോള്‍, തീരെ പഴയ വീടായതിനാല്‍ ഇടിഞ്ഞു വീഴുമെന്നു പേടിച്ചു ഇവിടെ താമസിചില്ലെന്നാണ് പിന്നീട് അറിയാന്‍ കഴിഞ്ഞത്‌. ഈ വഴിപോക്കന് ഇത് തന്നെ ധാരാളം, എന്നാലും ഈ വിവര ദോശി ഉള്ള സമ്പാദ്യം മൊത്തം ചിലവാക്കി എന്തിനു ഈ കടുംകൈ ചെത്ത്‌ചെയ്തു എന്നോര്‍ത്ത് എനിക്ക് സഹതാപം തോന്നി.

വീടിന്റെ അകത്തു കേറിയപ്പോള്‍ ഒരു കാര്യം ബോധ്യമായി. ആശാന്‍ അവിടെ താമസം തുടങ്ങാന്‍ പോകുന്നേയുള്ളൂ. പെയിന്‍റിംഗ് ഒക്കെ ചെയ്തു ആകെക്കൂടി തൊണ്ണൂറു വയസ്സുള്ള കിഴവിക്ക് കല്യാണ ഡ്രസ്സ്‌ ഉടുപ്പിച്ച പോലോത്ത ഒരു ലുക്ക്‌. രണ്ടു കിടപ്പ് മുറി ഉള്ളതില്‍ വലുത്‌ ആശാന്‍ കയ്യടക്കിയിരിക്കുന്നു. ചെറിയ ഒരെണ്ണം എനിക്കും. ഒരുമയുണ്ടെങ്കില്‍ ഉലക്ക മേലും കിടക്കാം എന്നാണല്ലോ പഴമക്കാര്‍ പഠിപ്പിച്ചത്‌. ചെറിയ റൂം ആയാല്‍ സൗകര്യമാണ് അത്രയല്ലേ വൃത്തിയാക്കാന്‍ മിനക്കെടെണ്ടാതുള്ളൂ എന്ന് കരുതി ഞാന്‍ സമാധാനിച്ചു.

പക്ഷെ ചിലതൊക്കെ പറയാതെ എന്റെ കൈത്തരിപ്പു മാറുന്നില്ല. പരദൂഷണം എന്നൊക്കെ വേണേല്‍ നിങ്ങള്‍ക്ക് പറയാം.

ന്യൂസീലാണ്ടിലെ രണ്ടു ദ്വീപുകളും തിരഞ്ഞാലും ഇവിടതെതിനേക്കാള്‍ പഴയ ഒരു ഫ്രീസര്‍ കിട്ടാന്‍ സാധ്യതയില്ല. യൂറോപിലെങ്ങാന്‍ ആയിരുന്നേല്‍ ഇത് അടുത്തുള്ള മ്യൂസിയത്തില്‍ പണ്ടെങ്ങാന്‍ സ്ഥാനം പിടിച്ചേനെ... മറ്റു സാധനങ്ങളെല്ലാം ഒരു വിധം പുതിയതാണ് ഓരോന്നിനും ഒരു 25-30 വര്‍ഷത്തെ പഴക്കമേ കാണൂ.. ബാത്ത്റൂമിലെ ഷവറില്‍ ചൂട് വെള്ളം കിട്ടണമെങ്കില്‍ പഴയ ഷോര്‍ട്ട് വേവ് റേഡിയോ ട്യൂണ്‍ ചെയ്യുമ്പോലെ അര മണിക്കൂര്‍ മിനക്കെടണം...സാരമില്ല, പച്ച വെള്ളത്തില്‍ കുളിക്കുന്നതാനല്ലോ ചര്‍മ്മത്തിന്റെ ആരോഗ്യത്തിനും മുടി കൊഴിച്ചില്‍ തടയാനും നല്ലത്. വീടിന്റെ ലോക്ക് വര്‍ക്ക്‌ ചെയ്യുന്നില്ല ഉടനെ ശരിയാക്കും എന്ന് അയാള്‍ പറഞ്ഞു. തക്കാളിപ്പെട്ടിക്കെന്തിനാ മാഷെ ഗോദ്രേജിന്റെ പൂട്ട് എന്ന് ഞാന്‍ ചോദിച്ചില്ല.

ചുരുക്കി പറഞ്ഞാല്‍ ഒരു പാടു ആന്റിക് വാല്യൂ ഉള്ള ആ പുരാതന ഗൃഹം എന്റെ താല്‍ക്കാലിക കൊട്ടാരമാക്കാന്‍ തന്നെ ഞാന്‍ അങ്ങ് തീരുമാനിച്ചു. വാടകയും മറ്റു കാര്യങ്ങളും ചര്‍ച്ച ചെയ്തുറപ്പിച്ചു പുറത്തിറങ്ങിയപ്പോഴാണ് ആളുടെ കാര്‍ എന്റെ ശ്രദ്ധയില്‍ പെട്ടത്. അതോടെ ആ വീടും ഫ്രിഡ്ജും എന്ന് വേണ്ട എല്ലാം പുതിയതായി എനിക്ക് തോന്നി. കാരണം കാളവണ്ടി യില്‍ നിന്നും മോട്ടോര്‍ യുഗം തുടങ്ങിയ സമയത്തുണ്ടാക്കിയ ഒരു കാര്‍.... അല്ലേലും പകല്‍ ഉറങ്ങി രാത്രി ഇരുട്ടിന്‍റെ മറവില്‍ ചുറ്റിക്കളിക്കുന്നവന് പുതിയ കാര്‍ ആവശ്യമില്ലല്ലോ.

ഈ കിവികള്‍ക്ക് മലയാളം വായിക്കാന്‍ അറിയാത്തത് നമ്മുടെ ഭാഗ്യം...ല്ലേ...?

കാടി - അഥവാ കഞ്ഞിവെള്ളം (Rice Milk)

2009-08-29T08:32:00.002+01:00

ന്യൂസിലാന്‍ഡില്‍ പോകുകയാണെന്ന് പറയുമ്പോള്‍ തന്നെ ചിലരുടെ കമന്റ് മനുഷ്യരെക്കാള്‍ എത്രയോ ഇരട്ടി ആടുമാടുകള്‍ ഉള്ള നാടാണ് നിനക്ക് വേറെ എവിടേം പോയിക്കൂടെ എന്നൊക്കെയാണ്. എന്തായാലും ഈ ചോദിക്കുന്നവരെക്കാള്‍ എത്രയോ മെച്ചം ഈ പറയുന്ന കാലികള്‍ തന്നെയാണെന്ന് ഞാന്‍ അങ്ങ് സങ്കല്‍പ്പിക്കും. ഒന്നുമില്ലെങ്കിലും അവറ്റകള്‍ വേണ്ടതിനും വേണ്ടാത്തതിനും കമന്റ് അടിക്കില്ലല്ലോ... പക്ഷെ ന്യൂസിലാന്‍ഡില്‍ എത്തി രണ്ടു മാസം ആയിട്ടും നാല് കാലില്‍ നടക്കുന്ന മൂന്നേ മൂന്നു ജീവികലെയെ ഞാന്‍ കണ്ടിട്ടുള്ളൂ, എന്റെ ആജന്മ ശത്രുവായ പൂച്ചയും, എന്റെ പേടി സ്വപ്നമായ പട്ടിയും, പിന്നെ ചില വെള്ളിയാഴ്ച്ച രാത്രികളില്‍ ഓവര്‍ഡോസ് തണ്ണിയദിചുവരുന്ന എന്റെ സഹവീടനും.

ആളുകളേക്കാള്‍ കൂടുതല്‍ കാലികള്‍ ഉള്ളത് കൊണ്ടും കാര്യമുണ്ട്, ഇഷ്‌ടം പോലെ പാല്‍ കിട്ടുന്നുണ്ട് അതും വളരെ ചീപ്‌ ആയി, ആളുകള്‍ ഉള്ളത് കൊണ്ട് എന്ത് പ്രയോജനം ഉണ്ടാവാനാ..അല്പം പരദൂഷണം കേള്‍ക്കമെന്നതല്ലാതെ. ഇവിടെ വന്നതിനു ശേഷം വീക്കിലി രണ്ടു ലിറ്റര്‍ പാല്‍ ഞാന്‍ കുടിച്ചു തീര്‍ക്കുന്നുന്ട്. ഓരോ വീക്കിലും വേറെ വേറെ ബ്രാന്‍ഡ്‌ പാല്‍ ടെയിസ്റ്റ് ചയ്യാന്‍ മാത്രം ബ്രാണ്ടുകളും സൂപര്‍മാര്‍ക്കടുകളില്‍ ലഭ്യമാണ്. ഈക്കഴിഞ്ഞ ശനിയാഴ്ച "റൈസ്" എന്ന് വെണ്ടക്കാ അക്ഷരത്തില്‍ എഴുതിയ ഒരു പാക്കറ്റ് പാല് ഉം പിന്നെ ആങ്കര്‍ ന്റെ ഒരു പാക്കറ്റും വാങ്ങി -- മൊത്തം ആറു ഡോളര്‍.

ചായ ഉണ്ടാക്കിയപ്പോള്‍ എന്തോ ഒരു പിശക് ഉള്ളതായി തോന്നി.. ചായയില്‍ ഒരു കഞ്ഞി മറിഞ്ഞ പോലെ... പാല്‍ കേടാവാനുള്ള സാദ്യതയോന്നും ഇല്ല. എന്നാലും ഒന്ന് ചെക്ക്‌ ആക്കിക്കളയാം എന്ന് വച്ചു പാല്‍ ഒന്ന് വിശകലനം ചെയ്തു.. മോശമായ സ്മെല്‍ ഒന്നും ഇല്ല. അധികം ആലോചിക്കാന്‍ നിക്കാതെ ഞാന്‍ എന്റെ വഴിക്ക് പോന്നു. രാത്രി ചായ ഉണ്ടാക്കുമ്പോള്‍ എന്റെ സഹവീടന്‍ (ഫ്ലാറ്റ്‌-മേയ്റ്റ്‌) എന്നെ എന്തോ ഒരു പന്തികെടുള്ളപോലെ നോക്കുന്നു.. ഈ സായ്പ്പിനു എന്റെ ചായ ഉണ്ടാക്കുന്നതില്‍ എന്തോ ഒരു പുച്ഛം ഉള്ള പോലെ.

സഹി കേട്ടപ്പോള്‍ അവന്റെ അക്കൌണ്ടിലേക്ക് മലയാളത്തില്‍ നാല് തെറി ട്രാന്‍സ്ഫര്‍ ചെയ്ത ശേഷം എന്താ ആക്ച്വലി കാര്യം എന്ന് അന്വേഷിച്ചു.. അപ്പോയാ അയാള്‍ പറയുന്നത് കഞ്ഞി വെള്ളം കൊണ്ട് ചായ ഉണ്ടാക്കുന്നവനെ അയാള്‍ ആദ്യമായി കാണുകയാണെന്ന്. അപ്പോഴാണ്‌ എനിക്ക് ഇന്നലത്തെ ആ കഞ്ഞിചായയെ ഓര്‍മ്മ വന്നത്. ദിവസവും അടുക്കളയില്‍ നിന്നും വെസ്റ്റ്‌ ആക്കുന്ന, ഭൂമി മലയാളത്തിലെ അടുക്കളകളിലെ പ്രധാന ഉപോല്‍പ്പന്നം ആയ കാടി ആണല്ലോ ദൈവമേ ഞാന്‍ കാശ് കൊടുത്തു വാങ്ങിയത്...

ഇത്രേം ആടുമാടുകള്‍ ഉണ്ടായിട്ടും ഇവന്മാര്‍ക്ക് ഈ അരിപ്പാല്‍ അഥവാ "കാടി" പാലിനൊപ്പം വച്ച് വില്‍ക്കേണ്ട വല്ല ആവശ്യവും ഉണ്ടോ? . വെറുതെയല്ല ഇങ്ങോട്ട് വരുമ്പോള്‍ നാട്ടുകാര്‍ ചോദിച്ചത് - നിനക്ക് വേറെ എവിടേം പോയിക്കൂടെ?

കൃത്രിമ മൂത്രം

2009-07-02T18:06:00.000+01:00

മാന്യമായി മടപ്പള്ളി ഗവ കോളേജില്‍ ഫസ്റ്റ് ഗ്രൂപ്പിലും സെക്കന്റ് ഗ്രൂപ്പിലും PDC ക്കു ചേരാനുള്ള എല്ലാ യോഗ്യതയും ഉണ്ടായിട്ടും വിധിയുടെ വിളയാട്ടം കൊണ്ടു മാത്രം വടകരയിലെ ഒരു ഗവ സ്കൂളില്‍ പ്ലസ് ടു എന്ന വിചിത്ര കൊഴ്സിനു ചേരേണ്ടി വന്ന അനേകം ഹത ഭാഗ്യരില്‍ ഒരാള്‍ മാത്രമാണു ഈ ഞാന്‍ .

വരാനുള്ളതു വഴിയില്‍ തങ്ങില്ലല്ലൊ.. എന്റെ കാര്യത്തില്‍ ഈ ഹത ഭാഗ്യം വന്നതു ഞങ്ങളുടെ അയല്‍ വില്ലേജും എന്റെ ഉമ്മാന്റെ ജന്‍മ നാടുമാ‍യ വെള്ളൂരിലെ ഞങ്ങളുടെ ഒരു ഭഹുമാന്യ സുഹ്രുത്ത് ബാലകൃഷ്ണന്‍ മാഷിലൂടെയായിരുന്നു. വടകരയിലെ പ്രശസ്തമാ‍യ ഈ സ്കൂളില്‍ അഡ്മിഷന്‍ കിട്ടാന്‍ ആളുകള്‍ പിടിവലി ആണെന്നും കിട്ടിയാല്‍ അതു എന്റെ ജീവിതത്തിലെ ഒരു വഴിത്തിരിവാകുമെന്നും മറ്റും കേട്ടപ്പോള്‍ കന്നി എഴുത്തില്‍ തന്നെ പത്താം തരം പാസ്സായ ഒരു കുട്ടിയുടെ രക്ഷിതാക്കള്‍ അതില്‍ വീണു പോയാല്‍ അവരെ കുറ്റം പറയാന്‍ ഒരിക്കലും പറ്റില്ല.

മാത്രമല്ല ഈ മാഷിന്റെ മിടു മിടുക്കിയായ ഒരു മോള്‍ ആ സ്കൂളിലാണു പഠിക്കുന്നതു എന്നു കേട്ടപ്പൊള്‍ മാഷു പറഞ്ഞതില്‍ കാര്യം ഉണ്ടെന്നു എനിക്കും തോന്നി.

അങ്ങനെയാണു കോളേജ് ജീവിതത്തിന്റെ ഒരുപാടു സ്വപ്നങ്ങളുമായി പത്താം ക്ലാസ്സ് പാസ്സായ ഞാന്‍ സംസ്കൃതം ഹയര്‍ സെക്കന്‍ഡറി സ്കൂള്‍ എന്നു പെരുള്ള, കാഴ്ചയില്‍ അത്രയൊന്നും സംസ്കൃതമാ‍ണെന്നു തോന്നാത്ത ഈ സ്കൂളില്‍ എത്തുന്നത്.

അഡ്മിഷനു പോയപ്പോള്‍ നമ്മുടെ മാഷ് പറഞ്ഞത് കുറച്ചൊക്കെ സത്യമാണെന്നു മനസ്സിലായി. വന്നിരിക്കുന്നവരെല്ലാം അഞ്ഞൂറിനും മുകളില്‍ മാര്‍ക് ഉള്ളവര്‍, പഠിപ്പിസ്റ്റുകളും അല്ലാത്തവരും ആ‍യ നൂറ്റിപത്തു പിള്ളേര്‍ക്ക് മാത്രമാണു അവിടെ ജൊയിന്‍ ചെയ്യാനുള്ള ഹത ഭാഗ്യം ലഭിചത് എന്നും അതില്‍ ഒരാളാണു ഞാന്‍ എന്നും പിന്നീടു മനസ്സിലായി.

മൂക്കു കൊണ്ടു കാ‍റ്റിന്റെ ദിശ നിര്‍ണയിക്കാന്‍ പറ്റും എന്നതാണു ഈ സ്കൂളിന്റെ ഒരു പ്രത്യേകത. ആസഹനീയമായ ദുര്‍ഗന്ധം ആണെങ്കില്‍ കാറ്റു പടിഞ്ഞാറു നിന്നാണെന്നു മനസ്സിലാക്കാം ഇതിനു നാം വടകരയിലെ നഗരസഭാ മാലിന്യ നിക്ഷെപ കെന്ദ്രത്തോടു കടപ്പെട്ടിരിക്കുന്നു. തെക്കു നിന്നാണെങ്കില്‍ സ്കൂളിന്റെ പ്രാന്തപ്രദേശത്തെ ഒരേയൊരു അന്ന ദാതാവായ ഭാസ്കരേട്ടന്റെ പീടിയയിലെ മത്തി പൊരിച്ചതിന്റെ കൊതിയൂറുന്ന മണവും ആയിട്ടായിരിക്കും കാറ്റിന്റെ വരവ്. കിഴക്കു നിന്നും വരുന്ന കാറ്റിനു കെ എസ് ഇ ബി സബ് സ്റ്റേഷനിലെ അമിത ലോഡ് സംഭാവന ചെയ്യുന്ന ഒരു പ്ലാസ്റ്റിക് കരിഞ്ഞ ഗന്ധവും, വടക്കു നിന്നണു കാറ്റെങ്കില്‍ ഗവ ആശുപത്രിയില്‍ നിന്നും വരുന്ന ഒരു ഡെറ്റോല്‍ ടച്ചുള്ള ഗന്ധവുമായിരിക്കും.

ജീവിതത്തില്‍ ആദ്യമായി, നാദാ‍പുരത്തു പറയുന്ന മലയാളം അല്ല യതാര്‍ഥ മലയാളം എന്നു മനസ്സിലാക്കാ‍ന്‍ കഴിഞ്ഞതു ഈ സ്കൂളില്‍ നിന്നാണ്‌. കെമിസ്ട്രിയിലെ സത്യന്‍ മാഷ് ഈ വരുന്ന രണ്ടാം ശനി സ്പെഷ്യല്‍ ക്ലാസ്സ് വേണമൊ എന്നു ചോദിചപ്പോള്‍ ആവുന്നത്ര ശക്തിയോടെ തനി നാദാപുരം ഭാഷയില്‍ മാണ്ട എന്നു പറഞ്ഞപ്പോള്‍ ബാക്കി പിള്ളേരും മാഷും കൂടി കളിയാക്കി ചിരിച്ചപ്പൊളുണ്ടായ ആ ചമ്മല്‍ ഇപ്പൊഴും മറന്നിട്ടില്ല. ഇതു പോലെ എന്റെ മലയാളത്തിനു വിലപിടിപ്പുള്ള അനേകം സംഭാവനകള്‍ നല്‍കാന്‍ ഈ സ്കൂളിനു കഴിഞ്ഞിട്ടുണ്ട്.

അരിഷ്ടത്തിന്റെ കുപ്പിയില്‍ വെല്ലം -ശര്‍ക്കര- ഇട്ടു പത്തായത്തില്‍ വച്ചു അതി വിദഗ്ദമായി പിടിച്ച കൂറയെയും, വടകര മേഘലയിലെ മുഖ്യ തവള പിടുത്തക്കാരന്‍ എത്തിച്ചു തരുന്ന കൊഴുത്ത പേക്കച്ചികളെയും സുവോളജി ലാബില്‍ ഓപറേറ്റു ചെയ്യുമ്പോള്‍ കിട്ടുന്ന സന്തോഷം Christiaan Barnard നു ലോകത്തിലെ ആദ്യ ഹൃദയം മാറ്റി വെക്കല്‍ ശസ്ത്രക്രിയ വിജയകരമായി ചെയ്തപ്പോള്‍ കിട്ടിക്കാണുമോ എന്നു സംശയമാണ്.

പതിവു പോലെ ഒരു ദിവസം ഉച്ചക്കു ശേഷം സുവോളജി പഠിപ്പിക്കുന്ന മേരി ടീച്ചര്‍ ക്ലാസ്സില്‍ എത്തി. മൂത്രം പരിശോധനയുടെ ബാല പാഠങ്ങള്‍ പഠിപ്പിക്കലാണു അന്നത്തെ ടീച്ചറുടെ അജണ്ട. പക്ഷെ കുടി വെള്ളം തരാനുള്ള ഒരു സംവിധാനവും ഇല്ലാത്ത, ഒറ്റപ്പെട്ട പ്രദേശത്തുള്ള ഈ സ്കൂളില്‍ ഉച്ചക്കു ശേഷം ആരുടെയെങ്കിലും റിസര്‍വോയറില്‍ അല്പമെങ്കിലും മൂത്രം ബാക്കിയുണ്ടാകാന്‍ ഒരു ചെറിയ സാധ്യത പൊലും ഇല്ലെന്നു തിരിച്ചറിയാനുള്ള സാമാന്യ ബുദ്ധി ടീച്ചര്‍ക്കും ഇല്ലതെ പോയി.

ഒരു തുള്ളീ മൂത്രം പൊലും നഷ്ടപ്പെടുത്താന്‍ തയ്യാറല്ലാത്ത ഒരു സമ്മൂഹത്തില്‍ ഒരിക്കലും ഒരു ഡോക്ടര്‍ പിറവിയെടുക്കില്ല എന്ന് കാര്‍ള്‍ മാര്‍ക്സ് പറഞ്ഞിട്ടുള്ള കാര്യം കമ്മ്യൂണിസ്റ്റ് കാരിയായ ടീച്ചര്‍ പലതവണ ഓര്‍മപ്പെടുത്തിയിട്ടും ആരും മൂത്രം കൊടുക്കാന്‍ തയ്യാറാവാതിരുന്നതു ടീച്ചറെ ദേഷ്യം പിടിപ്പിക്കാനോ, ഭാവിയില്‍ ഒരു ഭിഷഗ്വരന്‍ ആകാന്‍ ആഗ്രഹം ഇല്ലാഞ്ഞിട്ടൊ ആയിരുന്നില്ല. ഇല്ലാത്ത മൂത്രം ഉണ്ടാക്കന്‍ കാര്‍ള്‍ മാര്‍ക്സ് അല്ല പിണറായി വിജയന്‍ വിചാരിച്ചാല്‍ പോലും നടക്കില്ലല്ലോ..

അഞ്ചു മിനിട്ടിനകം മൂത്രം നല്‍കാന്‍ സ്വമേധയാ തയാറായി ആരെങ്കിലും മുന്നോട്ടു വരാത്ത പക്ഷം, പ്രതിപക്ഷത്തെ പോലെ ക്ലാസ്സില്‍ നിന്നും വാക്കൌട്ട് നടത്തും എന്നു ടീച്ചര്‍ അന്ത്യ ശാസനം നല്‍കിയിട്ടും മുഖത്തോടു മുഖം നൊക്കാനല്ലാതെ മൂത്ര ദാനത്തിനു വേണ്ടി ആരും മുന്നൊട്ടു വന്നില്ല.

ഒരിറ്റ് മൂത്രത്തിന്റെ വില എന്തു മാത്രം വലുതാണെന്നു മനസ്സിലാക്കിയ നിമിഷങ്ങള്‍..

പെട്ടെന്നാണു എന്റെ മനസ്സില്‍ ഒരു ഐഡിയ മിന്നി മറഞ്ഞത്. മാസങ്ങളായി ഉപയോഗ ശൂന്യമായി കിടക്കുന്ന സ്കൂളിലെ വാട്ടര്‍ ടാപ്പ്.. അതു തുറന്നാല്‍ ഒരു അര കുപ്പി വെള്ളമെങ്കിലും കിട്ടും എന്ന ഉറപ്പിലാണ് ക്ലാസ്സിനെ മൊത്തം ആവെശഭരിതരാക്കിക്കൊണ്ട് സാഹസിക കൃത്യങ്ങളില്‍ തല്‍പരനായ ഞാന്‍ ആ പ്രഖ്യാപനം നടത്തിയത്..

മൂത്രം നല്‍കാന്‍ ഞാന്‍ റെഡി..

എല്ലാവരും ഹാപ്പി. ഉദ്ധ്യോകജനകമായ നിമിഷങ്ങള്‍ക്ക് അറുതി വരുത്തിക്കൊണ്ട് നിറ പുഞ്ചിരിയോടെ വലിയ ഒരു ടെസ്റ്റ്ട്യൂബ് ടീച്ചര്‍ എന്റെ കയ്യില്‍ ഏല്‍പ്പിച്ചു.

ആങ്ങനെ ലോകത്തിലെ ആദ്യ കൃത്രിമ മൂത്ര നിര്‍മാണം ആരംഭിക്കുകയായി..

കെമിസ്ട്രി ലാബിന്റെ മുന്‍പില്‍, അടുത്തടുത്തു കിടക്കുന്ന മേലോട്ടു തള്ളിയാല്‍ വെള്ളം വരുന്ന രണ്ടു ടാപ്പില്‍ ഒന്നിനു താഴെ ടെസ്റ്റ്ട്യൂബ് വച്ചു മറ്റേ ടാപ്പിലൂടെ അതിശക്തമായി ഊതി, എകദേശം ആ ടെസ്റ്റ്-ട്യൂബിന്റെ മുക്കാല്‍ ഭാഗത്തോളം ക്രിത്രിമ മൂത്രം സംഘടിപ്പിച്ചു ഒരു ഹീറൊ ആയി ഞാന്‍ ക്ലാസ്സില്‍ തിരിച്ചെത്തി. കാലപ്പഴക്കം ചെന്നതിനാല്‍ വെള്ളതിനു ശരിക്കും മൂത്രത്തിന്റെ തനതു ലുക്ക് ഉണ്ടായിരുന്നു.

ആങ്ങനെ അറുപതു പേര്‍ അടങ്ങുന്ന ഭാവി ഡോക്ടര്‍മാര്‍ വ്യാജ മൂത്രത്തിലെ ഗ്ലൂക്കോസ്, ലിപ്പിഡ്സ്,..മുതലായവ പരിശോധിച്ചു സംതൃപ്തി അടഞ്ഞു.

എല്ലാവരുടെയും മുഖത്തു കണ്ട ആ സന്തോഷം പക്ഷെ മേരി ടീച്ചര്‍ടെ മുഖത്തു കാണാന്‍ പറ്റിയില്ല.. മുഖത്തു ആകപ്പാടെ ഒരു മ്ലാനത..

ടീച്ചര്‍ എന്റെ അടുത്തു വന്നു പറഞ്ഞു : നീയിന്നു ക്ലാസ്സ് കഴിഞ്ഞു പൊകുന്നതിനു മുന്‍പു എന്നെ വന്നു ഒന്നു കാണണം, മറക്കരുത്..

എനിക്കു ആകപ്പാടെ ഒരു കണ്‍ഫ്യൂഷന്‍.. ടീച്ചര്‍ എന്തിനായിരിക്കും കാണാന്‍ പറഞ്ഞത്..

രണ്ടു സാധ്യതകളെ ഞാന്‍ കണ്ടുള്ളൂ‍.. ഒന്നു എന്റെ ആത്മാര്‍ഥതയെ അഭിനന്ദിക്കാന്‍...അല്ലെങ്കില്‍ എന്റെ തട്ടിപ്പു ടീച്ചര്‍ക്കു പിടി കിട്ടിക്കാണും.. അതിനു ശകാരിക്കാന്‍..

മനസ്സില്ലാ മനസ്സോടെ വൈകുന്നേരം ഞാന്‍ ടീച്ചര്‍ടെ ഓഫീസില്‍ ഹാജര്‍..

ടീച്ചര്‍ കൂടുതല്‍ ഒന്നും പറയാതെ എന്റെ കയ്യില്‍ ഒരു കത്തു തന്നു.. അതു പൊട്ടിച്ചു നൊക്കാതെ രക്ഷിതാവിനെ കൊണ്ടു ചെന്നു ഏല്‍പ്പിക്കാന്‍ പറഞ്ഞു..

ആക്രാന്തത്തിനു പേരു കേട്ട എനിക്കുണ്ടൊ വീടു എത്തുന്നതു വരെ ക്ഷമിക്കാന്‍ പറ്റുന്നു.. ടീച്ചറു‍ടെ ഓഫീസില്‍ നിന്നു ഇറങ്ങിയ ഉടനെ തന്നെ ഞാന്‍ അതു പൊട്ടിച്ചു വായിച്ചു..

അതില്‍ എന്റെ രക്ഷിതാവിനെ അഡ്രസ് ചെയ്തു ഒരു അഭ്യര്‍ഥനയാണു, അതിലെ പ്രധാന കാര്യം ഇതാണ്:

ഇവന്റെ യൂറിന്‍ ടെസ്റ്റ് ചെയ്തപ്പോള്‍ ചില്ലറ പ്രശ്നങ്ങള്‍ കാണുന്നുണ്ട്, അതു കൊണ്ട് എത്രയും വേഗം നല്ല ഒരു നെഫ്രോളജിസ്റ്റ് നെ കാണിക്കണം..

വെള്ളവും മൂത്രവും തിരിച്ചറിയാന്‍ പറ്റാത്ത സുവോളജി ടീച്ചര്‍മാര്‍ ഉള്ള നാട്ടില്‍ ഒരിക്കലും ഒരു നല്ല ഡോക്ടര്‍ ജനിക്കില്ല എന്നു മാര്‍ക്സ് പറയാതിരുന്നത് നമ്മുടെ ഭാഗ്യം..

---
repost(original post at yasark.wordpress.com)